Ааспыт нэдиэлэҕэ куйаар ситиминэн СӨ Бырабыыталыстыбатын Бэрэссэдээтэлин солбуйааччы Сергей Местников сорудаҕынан 2023 сылга Өймөкөөҥҥө Олоҥхо Ыһыаҕын ыытары бэлэмниир тэрийэр кэмитиэт мунньахтаата.
Сүбэ мунньахха Олоҥхо Ыһыахтарын тэрээһиннэрин бэлэмниир тустаах министиэристибэлэр уонна биэдэмистибэлэр эппиэттээх исписэлиистэрэ уонна Халыма-Индигиир улуустарын бөлөҕүттэн сэттэ муниципальнай тэриллии баһылыктара кыттыыны ыллылар. Суолталаах тэрээһини СӨ култуура уонна дуобунас сайдыытын миниистирэ Юрий Куприянов салайан ыытта.
Оробуочай көрсүһүүгэ Өймөкөөн улууһугар бүгүҥҥү күҥҥэ ыытылла турар былааннаах үлэ туһунан муниципалитет баһылыга Иннокентий Сивцев билиһиннэрдэ. Маны таһынан, тирээн турар боппуростары ырытыы буолла.
— Суолталаах тэрээһиҥҥэ Халыма-Индигиир улуустарын бөлөҕүн сэттэ баһылыга тоҕо кыттыыны ылбыттарын быһаардахха, бастакы барыллааһын былаан быһыытынан 2023 сылга Өймөкөөҥҥө ыытыллыахтаах Олоҥхо Ыһыаҕын Абый, Аллайыаха, Муома, Үөһээ Халыма, Орто Халыма, Аллараа Халыма уонна Өймөкөөн улуустара кыттыһан ыытыахтаах этилэр. Ол эрээри сыстыганнаах дьаҥ өрө туран, бары бырааһынньыктары, тэрээһиннэри ыытыыга хааччах киирэн, бу боппуруос уустугурда. Онон мунньах быһаарыытынан, сиһилии ырытыһан баран, олунньу бүтэһигэр Халыма-Индигиир улуустара Өймөкөөҥҥө ыытыллар Олоҥхо Ыһыаҕар кыттыылара бүтэһиктээхтик быһаарыллыаҕа, — диэн иһитиннэрдэ Өймөкөөн улууһун баһылыга Иннокентий Сивцев.
Елена ПОТОЦКАЯ, “Саха сирэ” хаһыат, edersaas.ru
Хаартыска: sachaja.