Сэтинньи 4 күнүгэр Ил Дархан Айсен Николаев улуус баһылыктарын кытары коронавируснай инфекцияны утары охсуһуу туһунан мунньах ыытта.
Бүгүн 197 киһи эбии ыалдьыбыта билиннэ. Сэтинньи ыйтан күн аайы өрөспүүбүлүкэҕэ 190-тан тахсалыы, киин куоракка 100-тэн тахсалыы киһи ыалдьар.
Арассыыйаҕа коронавируһунан ыалдьыы 100 тыһыынча киһиэхэ ортотунан 1127 буолар. Өрөспүүбүлүкэҕэ 100 тыһыынча нэһилиэнньэҕэ 1457 киһи ыалдьар. Онон өрөспүүбүлүкэҕэ ыалдьыы көрдөрүүтэ үрдүк, оттон анаалыһы оҥоруу ахсаанынан 15 бастыҥ эрэгийиэннэргэ киирсэр. Ол курдук, 100 тыһыынча нэһилиэнньэҕэ 571 анаалыс оҥоһуллар.
Билигин 107 киһи реанимацияҕа сытар, кинилэртэн 20 киһи ИВЛ аппарааттаах.
Айсен Николаев сэтинньи ый бүтүөр диэри эпидемиологическай балаһыанньаны тупсарар соругу туруорда. Үлэни биэрээччилэри хонтуруоллуурга соруйда, 65-тэн үөһээ саастаах уонна олоҕурбут ыарахан ыарыылаах дьон үлэҕэ таһаарар бобуулааҕын туһунан иһитиннэрдэ. Аҕам саастаах уонна ыарыһах дьону эмтииргэ улахан болҕомто ууруллуохтааҕын сэрэттэ.
Кэлэр-барар дьону хонтуруолга ылыы, маассабай тэрээһиннэри хааччахтааһын баар буолара ирдэнэр. Каникул кэмигэр оҕолор элбэх буолан мустубаттарын, элбэх киһилээх сирдэргэ сылдьыбаттарын ситиһиллиэхтээх.
Бырабыыталыстыба чилиэннэрэ улуустарга баран, “суһал ыстааптарга” көмө-өйөбүл буолуохтара. Сэтинньи 4 күнүттэн Таатта, Ленскэй, Сунтаар, Ньурба, Орто Халыма, Аллайыаха, Мэҥэ Хаҥалас, Өлүөхүмэ улуустарыгар тиийиэхтэрэ.
— “Суһал көмөҕө”, “суһал лиинийэлэргэ” эрийии быдан аҕыйаата, балыыһаларга ноҕурууска кыччаата. Ол эрээри, балаһыанньа хаһан баҕарар мөлтүөн сөп. Санитарнай-эпидемиологическай нуормалары тутуһалларын ситиһэрбититтэн үлэбит түмүгэ тутулуктаах, — диэн Айсен Николаев эттэ.
Мунньахха улуус баһылыктара эпидемиологическай балаһыанньаларын туһунан отчуоттаатылар. Ил Дархан эминэн, харыстанар малларынан хааччыллыыны хонтуруолга ылалларыгар соруйда.
Ленскэй оройуонугар нэһилиэктэр икки ардыларыгар сырыыны тохтоппуттар. Уус Алдаҥҥа маассабай тэрээһиннэри боппуттар, рейдэлэр оҥоһуллаллар. Ньурба улууһа эминэн толору хааччыллан олорор. Баһылыктар анаалыс түмүгэ бытааннык кэлэр иэн эттилэр.
Роспотребнадзор управлениетын салайааччыта Маргарита Игнатьева мунньахха кыттыыны ылла. Кини этэринэн, нэһилиэнньэ 45 бырыһыана кирииптэн быһыыны ылбыт. Былаан быһыытынан, 60 бырыһыан ылыахтаахтар эбит. Онон сүрүннээн Дьокуускай куоракка вакцина тобоҕун биэриэхтээхтэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru