Уопсастыба

Сэтинньи 20 күнэ — Оҕо быраабын көмүскүүр күн

Сэтинньи 20 күнүгэр Саха Өрөспүүбүлүкэтигэр Бүтүн Арассыыйатааҕы оҕо быраабын көмүскүүр күн ыытыллыаҕа. Бу күн чэрчитинэн, араас тэрээһиннэр ыытыллыахтара.

edersaas.ru

Бүтүн Арассыыйатааҕы оҕо быраабын көмүскүүр күнү сыл аайы сэтинньи 20 күнүгэр бэлиэтиир туһунан 2013 сыл балаҕан ыйыгар «Арассыыйаҕа босхо юридическай өҥө» федеральнай сокуону олоххо киллэриини быһаарар бырабыыталыстыба хамыыһыйатын мунньаҕар быһаарыллыбыта.

1959 сыллаахха сэтинньи 20 күнүгэр Холбоһуктаах Нациялар Тэрилтэлэрин Генеральнай Ассамблеята «Оҕо быраабын декларациятын» ылыммыта. Декларацияҕа оҕо быраабын  хааччыйыыга эппиэттиир  дьон эбээһинэстэрин 10 тутула уонна оҕо дьоллоох оҕо саастанарыгар толору быраабын, көҥүлүн туһанарын хааччыйыы ыйыллыбыт. Киһи аймах  оҕоҕо баар үтүөнү барытын биэриэхтээх диэн суруллубут.

Бу күн 1989 сыллаахха Оҕо быраабын конвенцията ылыныллыбыта. Ол иһин, сэтинньи 20 күнэ Аан дойдутааҕы оҕо күнүнэн ааҕыллар.

Инбэлиит, тулаайах, төрөппүт көрүүтэ суох хаалбыт оҕолор бырааптарын көмүскээһин Арассыыйа сүрүн судаарыстыбаннай бэлиитикэтинэн буолар. Ол иһин, тэрээһиннэр оҕо быраабын көмүскээһин тиэмэтигэр ыытыллыахтара.

Аахсыйа чэрчитинэн, босхо юридическай өҥөлөрү оҥорор пууннар үлэлиэхтэрэ, оҕо быраабын, оҕону иитэ ылыы, төрөппүт уонна оҕо сыһыанын туһунан кэпсэтиилэр ыытыллыахтара. СӨ Үөрэххэ уонна наукаҕа,  Үлэ уонна социальнай сайдыы, Доруобуйа харыстабылын министиэристибэлэригэр, федеральнай уонна өрөспүүбүлүкэтээҕи толорор былаас уорганнарыгар, оскуолаларга, оҕо саадтарыгар араас таһымнаах тэрээһиннэр тэриллиэхтэрэ.

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата.

1
0
Telegram @edersaas20

Добавить комментарий