«Саха» НКИХ оҥорон таһаарбыт «Хаһан сайын буоларый?» сэрийээлэ бу нэдиэлэнэн түмүктэннэ.
Киинэ табылынна. Үгүс ырытыыны, кэпсэтиини таһаарда. Ол аата көрөөччү ылынна. Оттон киинэни уһулбут, сэрийээлгэ оонньообут артыыстар бэйэлэрин үлэлэрин туһунан санаалара хайдаҕый?
Сайын – дьолу күүтүү
Биллэн турар, киинэни ылынарга эпиграф курдук туспа «оруоллаах» Намыына толорор ырыаты ис хоһооно олус улахан суолталаах. Онон хоһоон ааптарын санаатын истиэҕиҥ.
Елизавета ЕГОРОВА, сэрийээл ырыатыгар хоһоон ааптара:
-Ырыа хоһооно чэпчэкитик тахсыбыта. «Сайын» диэн өйдөбүл дьыл кэмэ эрэ буолбакка, сырдыкка, ырааска, сылааска тардыһыы. Киһи дууһатыгар дьоллоох кэм үүнүүтэ. Саха киһитигэр сайын — күөххэ үктэнии. Ол эбэтэр уустук кэми тулуурдаахтык туораан, олоҕун анааран, алҕастарын көннөрөн, кэскили түстээһинэ. Дьиҥэр, хоһоонньут үгүс буоллаҕа. Онон миэхэ эрэнэн, киинэ ис хоһоонун арыйар хоһоонно ай диэн этии көтөхпүтүгэр Даана Сардка истиҥник махтанабын.
«Киһи атын хараҕынан көрөр эбит»
Ийэ барахсан оруола киинэҕэ олус табыллыбыт. Буолумуна, көрөөччү сөбүлүүр артыыһа оонньообутун кэннэ!
Елизавета ПОТАПОВА, Наталья оруолун оонньооччу:
— Киинэни сиэрийэнэн устубаттар. Тус-туспа сюжеты биир күн устар буолан, ол күннээҕи соруктаах оруолу арыйабыт. Онтон барыта таҥыллан, сэрийээл буолан таҕыстаҕына, киһи олох атын хараҕынан көрөр эбит. Холобура, ити аҕабыт эдьиийэ кэлбитигэр мин Натальябыттан олох кэлэйдим. Ымсыы баҕайы курдук көстөн таҕыстым дии. Дьиҥэр эмээхсин харчылааҕын истии түһүмэҕин устууга, мин көннөрү интэриэһиргээбит эрэ курдук оонньообутум ээ. Онтум сиэрийэлэри кытта холбооһуннарыгар дьоруойбун олох атыннык көрдөрөн кэбиспиппин. Дьон ол иһин кэлэйбиттии ырыталлар эбит. Саха көрөөччүтэ олус болҕомтолоох ээ.
Наһаа үчүгэй айар хамаандаҕа үлэлээн астынным. Оҕолор бары да оруолларыгар олус бараллар. Бэл, Венераны кытта оонньуу сылдьан, «бу кыыһы олус да табан булбуттар, Сусанна туттардыыр-хаптардыын, оннооҕор куоластыын маннык буолуохтаах» дии санаабытым. Онон талааннаах ыччаттары кытта алтыһыыбын дьылҕам бэлэҕин курдук ылынным.
«Саһылыкаан!» хамаанда
Дьиҥнээх олоххо сэмэй уонна нарын бэйэлээх Венера Софронеева Сусанна оруолун олус таба арыйбытын иһин, бу сылга өйгө хаалар киинэ дьоруойунан буолбута саарбаҕа суох.
Венера СОФРОНЕЕВА, Сусанна оруолун толорооччу:
— Мин олохпор Сусаннатааҕар олох атыммын. Ол эрээри режиссёрум Радомира Афанасьева хас биирдии түһүмэх аайы хайдах туттарбын, саҥарарбын, көрөрбүн барытын тута быһааран, көрдөрөн биэрэр буолан, түргэнник ылыммытым. Кэлин киинэ устата «Саһылыкаан!» диэтэ да, оруолбар киирэн хаалар буолбутум. Ити «Саһылыкаан!» диэн режиссер хамаандата иккиэммит эрэ билэр, туттар тиэрмиммитинэн буолбута. Ол аата мин көрөрдүүн-истэрдиин, туттардыын-хаптардыын уларыйа түһүөхтээхпин. Куоласпар кытта болҕомтобун ууруохтаах этим. Ол да иһин мин кэһиэхтээх куоласпыттан үгүс киһи ньиэрбинэйдээбит этэ. Кыһыл өҥү наһаа сөбүлүүбүн. Таҥаһым барыта кыһыл буолан, өҥ кытта киинэни ылынарга оруоллаах эбит. Онон уоттаах кыһыл таҥас Сусанна омсолоох оруолун өссө күүркэтэн биэрбитэ чахчы.
Идэбинэн хамсаабат баай-дуол инженерэбин. Түөрт сылы быһа биир кэбиниэккэ олорортон наһаа салгыбытым. Ол иһин үлэбиттэн баран, бэйэбин көрдүүр кэммэр ити сэрийээлгэ оонньуур дьону талыыга кыттыбытым. Онон айар үлэ алыбар ылларан баран, сөптөөх санааны ылыммыт эбиппин дии санаатым. Билигин хаартыскаҕа түһэриинэн дьарыктанабын. Сүрүн тиэмэм — дьиэ кэргэн. Төрүүр дьиэттэн тахсар оҕолоох ыаллары кытта үлэлэһэбин. Бу олох атын эйгэ. Онон айар үлэ — мин олоҕум анала эбит. Саҥа суолун тэлэ сылдьар киһини таба көрөн, киинэ эйгэтин «амсаппыттарыгар» сэрийээл хотуна Марфа Пермяковаҕа уонна режиссербар Радомира Афанасьеваҕа барҕа махталбын тиэрдэбин.
Максим – уустук оруол
Көрдөххө, ууну-уоту ортотунан сылдьар Максимы оонньообут эдэр киһи эмиэ дьиҥнээх олоххо олох атын киһи эбит.
Андрей СЛЕПЦОВ, Максим оруолун оонньооччу:
— Мин алта оҕолоох ыал улахан уолларабын. Таптыыр кэргэннээхпин, оҕолоохпун. Онон көрөргүт курдук, Максимтан олох атын киһибин. Биллэн турар, Максим оруола чэпчэки буолбатах, ылбычча киһи оонньообутунан барбат. Биһиги сүрүннээн режиссербут идиэйэтин, көрүүтүн олоххо киллэрдибит. Онон ирдэбиллээх устааччыга түбэһии, туһугар, дьол эбит. Мин социальнай роликтары устар буолан, бэйэм омсолоох да, үтүө да дьону оонньуубун. Онон бу эйгэҕэ чугаспын, уһулларга чэпчэки. Айар куттаах киһи буолан, өссө да киинэҕэ уһуллар баҕалаахпын. Онон биир эмэ режиссёр миэхэ оруол биэриэ диэн эрэнэбин.
«Тур, көр, үтүгүн…»
Артыыстар бары режиссердарын Радомира Афанасьеваны олус астынан бэлиэтээтилэр. Онон бу эдэркээн айар үлэһит «Тур, көр, үтүгүн…» диэн ирдэбиллээх хамаандата бэртээхэй киинэ уһуллан тахсарыгар улахан оруолу оонньоотоҕо.
Радомира АФАНАСЬЕВА, киинэ режиссера:
— Үлэм түмүгүттэн астынным. Кылаабынайа, артыыстарбар таба тайаммыппыттан үөрдүм. Кырдьыга эттэххэ, сыстыганнаах дьаҥынан сибээстээн, устарга бириэмэ олус ыгым этэ. Аны сүрүн уһулар эбийиэктэрбит (маҕаһыыннар, кафелар) сабыллан, устуу тохтуу сылдьыбыта. Ол иһин артыыстарбытын сүрүннээн: «Тур, көр, үтүгүн…» диэн ыйан-кэрдэн талбыппыт. Максим оруолугар сөптөөх киһи көстүбэккэ ыксаппыта. Элбэх киһини талан көрбүппүт да, биһиги ирдэбилбитигэр түбэһэр киһи көстүбэтэҕэ. Андрей Слепцовы кытта үлэлэспит буолан, мин кинини «положительнай» оруолга «хаһааммытым». Ол эрээри ыксаллаах түгэҥҥэ боруобаланан көрөрүгэр көрдөспүтүм. Киһим олох бэркэ арылынна. Биллэн турар, киинэбин көрөөччүгэ диэри тиэрдиибэр, муусукатыгар, таҥыытыгар бэйэбинэн сылдьыһан (түүн 3-4 чааска дьиэбэр тиийэр этим), ноҕорууска ханна барыай? Маныаха чугас дьоммор – ийэбэр уонна кэргэммэр өйөбүллэрин иһин барҕа махталбын тиэрдэбин.
Аны тугу күүтэбит?
Марфа ПЕРМЯКОВА, «Саха» НКИХ сэрийээл сулууспатын салайааччыта:
— Быйылгы кыһын устата эмиэ Даана Сард сценарийынан икки бэйэ-бэйэтигэр майгыннаспат эмиэ 16-лыы сиэрийэлээх «Олох диэн олох» уонна «Дьол тааһа» диэн киинэлэри көрдөрүөхпүт. Бу аныгы олох мелодрамалара. «Олох диэн олох» киинэ режиссера Елена Эверстова «Сүлүһүннээх таптал» сэрийээли устан, биһирэбили ылбыта. Оттон «Дьол тааһа» сэрийээли Марина Платонова уһулла. Кини «Ааспыт ааспат амтана» уонна «Күдээринэ күүрээн» киинэлэр режиссердара. Оттон кылаабынай дьоруойдар: «Олох диэн олох» сэрийээлгэ – Дмитрий Михайлов урбаанньыт Тарас Кузнецов оруолугар, «Дьол тааһа» киинэҕэ алмаас бырамыысыланнаһын бэтэрээнин оруолугар Степан Сивцев-Доллу оонньууллар. Онон бу киинэлэр эмиэ көрөөччү болҕомтотун тардыахтара.
«Хаһан сайын буоларый?» киинэ кэнниттэн ити икки сэрийээл иннинэ Георгий Матвеев сценарийынан «Офистар» диэн ситком (ситуационная комедия) көстүөҕэ. Кинини көрөөччү «Киэһэлик» биэриигэ Айаал оруолунан билэр. Бу дьону сааратар киинэ-кэмиэдьийэ. Дьэ, онон, күндү көрөөччүлэрбитин, кыһыҥҥы уһун киэһэлэргэ «Саха» НКИХ сэрийээллэрин көрүҥ диэн ыҥырабын.
… Сахалар бэйэбит сэрийээллэрдээхпит үчүгэйиэн!