Үлэ, социальнай сайдыы министиэристибэтэ Аҕа дойдуну көмүскүүр Улуу сэрии кэмигэр хорсуннук сэриилэспит, эбэтэр тыылга Кыайыыны уһансыбыт дьон ахсааннарын чуолкайдаата.
Ол кырыыстаах сэрии сыллара ыраатан истэхтэрин аайы, кыттыбыт, хааннарын тоҕон сэриилэспит, уоттаах сэрии алдьархайын илэ көрбүт, эрэйи-муҥу билбит дьоммут ахсааннара аҕыйаан иһэр. Кинилэргэ судаарыстыбаттан көмө көрүллэр, ол иһин сыллата ахсааннарын чуолкайдыыр наадалаах. Ол ааспыт сэрии кими да тумнубатаҕа, оннооҕор билигин кини ыар тыына таарыйбатах ыала диэн суох.
Өрөспүүбүлүкэҕэ, 2019 cыл муус устар 1 күнүнээҕи туругунан, 1941-45 сс. Аҕа дойдуну көмүскүүр Улуу сэрии кыттыылаахтара уонна инбэлииттэрэ – 100 киһи, сэриигэ өлбүт буойуннар огдооболоро – 2 киһи, “Блокадалаах Ленинград олохтооҕо” бэлиэ хаһаайыттара — 30 киһи, сэрии бэтэрээннэрин огдооболоро – 659 киһи бааллар.
Ону тэҥэ, сэрии кэмигэр фашистскай концлааҕырдарга, геттоларга хаайылла сылдьыбыт 20 киһи, 5426 тыыл бэтэрээнэ, сэрии кэмин оҕолоро (1945 сыл балаҕан ыйын 3 күнүгэр диэри сокуоннай саастарын туолбатахтар) – 7024 киһи баара биллэр.
Ангелина ВАСИЛЬЕВА, “Саха сирэ” хаһыат, edersaas.ru