2019 сыл тохсунньу ый 1 күнүттэн саҕалаан 2,6 тыһыынча “сэрии оҕолоро” социальнай төлөбүрдэри ылыахтарын уонна чэпчэтиилэринэн туһаныахтарын сөп. Бу туһунан Ил Түмэҥҥэ Саха Өрөспүүбүлүкэтин 2019 уонна 2020-2021 сыллаах бүддьүөтүн туһунан сокуонун барылын дьүүллэһии кэмигэр иһитиннэрдилэр.
Ил Түмэн салайааччыта Петр Гоголев Арассыыйа Аҕа баһылыга Владимир Путин бу дьыл ыам ыйын 9 күнүнээҕи «Аҕа дойду Улуу сэриитигэр Кыайыы 75 сылын бэлиэтээһин туһунан» Ыйааҕар олоҕуран саха аатырбыт снайпера Иван Кульбертинов албан аатын үйэтитэр сыалтан пааматынньык оҥоруутугар үбү-харчыны көрөр уонна “сэрии оҕолоругар” ыйын ахсын социальнай төлөбүрдэри оҥоруу туһунан этиилэри киллэрдэ.
Сокуон барылынан 1945 сыл балаҕан ыйын 3 күнүгэр дылы 18 саастарын туола илик дьоҥҥо ыйын ахсын 1 000 солкуобай, сылын ахсын доруобуйаларын туругун көрдөрүүнү хааччыйыы ситиһиллиэхтээх. Маны таһынан, үс сылга биирдэ Саха сирин иһигэр санаторийга эбэтэр куруорка эмтэнэр ороскуоттарын аҥаарын төлөнүөхтээх. “Сэрии оҕолоро” социальнай тэрилтэлэргэ уочарата суох, быһа сылдьар бырааптаныахтара. Бу сокуон олоххо 2019 сыл тохсунньу 1 күнүттэн киириэҕэ.
Бүгүҥҥү күҥҥэ Саха сиригэр үөһээ ааттаммыт сокуоҥҥа уопсайа 2646 киһи хапсар диэн Ил Түмэн пресс-киинэ иһитиннэрэр.
edersaas.ru
Хаартыскалар — Интэриниэттэн.