Улуу Кыайыы 75 сылын көрсө Таатта улууһун дьаһалтата сэрии сылларын оҕолоругар “Дети войны” диэн мэтээли оҥорторон бэлэмнээтэ.
edersaas.ru
Билигин Таатта улууһугар 352 сэрии сылларын оҕолоро бааллар. Уоттаах сэрии сылларыгар Айылҕа көҥүлүнэн үүнүү 1941-1945сс (– 820) буола сылдьыбыт. Үүнүү саамай түспүт сыллара 1942-1944 сыллар буолаллар.
1941-1945 сылларга национальнай архыып чахчыларынан 1962 оҕо төрөөбүт. Саамай элбэх оҕо (625) 1941 сыллаахха, оттон саамай аҕыйах 1943 сыллаахха 234 оҕо төрөөбүт.
Сэрии сылын оҕолоро тоҥууну-хатыыны, уот курааны, күүстээх үлэни, аччыктааһыны эттэринэн-хааннарынан билбит, холооно суох ыарахан үлэҕэ миккиллибит ыар дьылҕаламмыттара. Быыкаа бэйэлэрэ улахан дьону кытары тэбис тэҥҥэ үлэ фронугар сылдьыбыттара, ойуоккалыыр оҕо саас кэрэ кэмнэрин билбэккэ кииллийэ улааппыттара. Биллэн турар балартан доруобайтан доруобайдара ордубуттара, кырачаан бэйэлэрэ ыстаал курдук хатарыллыбыттара. Кинилэр сэрии кэмин ыараханын ааспыт дьон, ханнык да үлэттэн толлубакка, ардахтан, хаартан чаҕыйбакка, илиилэрин ньыппарынан туран үлэлээн, туруу үлэһиттэрин түмүгэр сир дойду оҥоһуллубута, дьиэлэр тутуллубуттара, совхозтар баар буолбуттара, олох тигинээбитинэн барбыта. Күн бүгүнүгэр диэри, үлэлии-хамсыы, сүбэлии-амалыы, ыйа-кэрдэ сылдьалларыттан биһиги дьоллоохпут.
Анна Яковлева, Таатта
edersaas.ru саайтка анаан