Сэрии дуораана: сураҕа суох сүппүт саллаат аймахтара көһүннүлэр...
Кыайыы 75 сыла - Олох-дьаһах

Сэрии дуораана: сураҕа суох сүппүт саллаат аймахтара көһүннүлэр

Соторутааҕыта социальнай ситимнэргэ Москватааҕы «Победа» көрдүүр этэрээт 1911 сыллаах төрүөх красноармеец Ефим Дмитриевич Ильин уҥуоҕун кырамтатын булбуттарын туһунан иһитиннэриилэрэ тарҕаммыта.

 

Суруйууга «сэбиэскэй саллаат Үөһээ Бүлүү улууһуттан төрүттээх буолуон сөп, Ржевтээҕи кыргыһыыга өлбүт» диэн бэлиэтэммит этэ. Сотору кэминэн Үөһээ Бүлүү Дүллүкүтүттэн Ефим Ильин аймахтара көстүбүттэрин туһунан истэн, Татьяна Ботакова төлөпүөнүн нүөмэрин булбутум.

Татьяна Яковлевна кэпсииринэн, Ефим Ильин уонна кини аҕатын эһээлэрэ бииргэ төрөөбүттэр эбит. «Аҕам тулаайах буолан, аймахтарын үчүгэйдик билбэт этэ. Арай сэриигэ баран өлбүт убайын Дьэкиими өйдүүр эбит. Ол иһин кинини кэриэстээн, биһигини, игирэ оҕолору хааннарын умнубатыннар диэн буоллаҕа буолуо, игирэм аҥаарыгар Дьэкиим аатын биэрбит. Миэхэ кини кыыһын аатынан Татьяна диэн ааттаабыт. Онон Ильиннэр аймах батсаапка анал бөлөх тэрийбиттэригэр, аймахтарбын булаары онно киирбитим. Онтон батсаапка аймахпыт Дьэкиим Ильин уҥуоҕун кырамтата көстүбүтүн туһунан иһитиннэрии тилийэ көппүтэ. Биһиги убайбыт Дьэкиим сэриигэ сураҕа суох сүппүтүн эрэ билэрбит. Онон батсаапка кэлбит иһитиннэрии төлөпүөнүгэр эрийбиппит. Саха сириттэн ити көрдүүр этэрээти кытта сибээстэһэр кыыс Ефим Ильин аймахтара көстүбүттэрин туһунан москваларга биллэриэм диэбитэ. Уҥуохтарын кырамтата көстүбүт сураҕа суох сүппүт саллааттар аймахтара бэс ыйыгар көрсөллөр үһү. Онно биһиги убайбыт төрөөбүт түөлбэтиттэн Үөһээ Бүлүү Хомустааҕын буорун илдьэ барыахпыт. Айаммыт суотун бэйэбит уйунабыт», — диэн кэпсээтэ Татьяна Яковлевна. … Аҕа дойду Улуу сэриитэ төһө да 76 сыл анараа өттүгэр түмүктэннэр, сэрии дуораана билигин да биллэр.

Елена ПОТОЦКАЯ, «Саха сирэ» хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

6 + 15 =