Ыам ыйын 6-7 күннэригэр бэтэрээннэргэ анаан, кинилэр олорор дьиэлэрин олбуордарыгар тиийэн, кэнсиэртиэхтэрэ. Өрөспүүбүлүкэҕэ “Поем двором” диэн Бүтүн Арассыыйатааҕы аахсыйа ыытыллар.
Ыам ыйын 6 күнүгэр Аҕа дойдуну көмүскүүр сэрии кыттыылааҕа Сергей Степанович Прихожаны номнуо эҕэрдэлээтилэр. Дирижер Павел Васьковскай салайааччылаах Lena River Brass филармония духовой оркестра кэлэн, “Ытык Ильмень” симфонияттан “Якутский победный марш” толордо.
Ону тэҥэ, «Смуглянка», «Тучи в голубом», «Хайыhар», «Майский вальс», «День Победы» ырыалары “Служба 02” ансаамбыл солистара уонна духовой оркестр толордулар. “Прощание Славянки” марш тыаһынан доҕуһуоллатан, 14129 байыаннай чаас сулууспалаахтара хаамтылар, бэтэрээҥҥэ чиэс биэрэн аастылар.
Губинскай уокурукка 9 дьиэ тиэргэнигэр кэнсиэртиэхтэрэ, ону тэҥэ, субуотунньуктар буолуохтара. Бу күннэргэ Дьокуускайга барыта 37 сэрии бэтэрээнин эҕэрдэлиэхтэрэ.
“Поем двором” аахсыйаны ыччат, социальнай коммуникация министиэристибэтэ тэрийэр, Дьокуускай куорат дьаһалтата, култуура, духуобунай сайдыы министиэристибэтэ уонна үлэ, социальнай сайдыы министиэристибэтэ кыттыһаллар.
Ангелина Васильева, “Саха сирэ” хаһыат, edersaas.ru
Хаартыска: СИА.