Сэрии бэтэрээннэрин биэнсийэлэригэр эбиллии ортотунан 9,5 тыһ. солкуобайга тиийэ улаатта. Федерация Сэбиэтэ бырабыыталыстыба таһаарбыт сокуонун өйүүрүн биллэрдэ. Маныаха быйыл 0,95 млрд. солк., кэлэр сылларга 1,42 млрд. солк. үп көрүллүөҕэ.
Билигин сэрии бэтэрээннэрэ биэнсийэлэригэр харчынан эбиллиини туталлар, эбэтэр икки биэнсийэни: кырдьар сааһынан уонна инбэлиитинэн ылаллар.
Байыаннай сулууспаттан уурайбыт дьоҥҥо биэнсийэлэрин дуоһунас, звание акылаатыттан, ыйдааҕы эбиллииттэн тирэнэн ааҕаллар.
Бу уларыйыы бойобуой дьайыыларга быһаччы кыттыбыт фронтовиктары, «За оборону Ленинграда» мэтээлинэн наҕараадаламмыттары, сэрии кэмигэр эчэйбит, контузияламмыт инбэлииттэри таарыйар.
Бу сокуон Аҕа дойду сэриитигэр Улуу Кыайыы 75 сылын көрсө РФ бэрэсидьиэнэ таһаарбыт укааһынан оҥоһуллубут. Владимир Путин бу иннинэ сэрии бэтэрээннэригэр биирдэ бэриллэр босуобуйаны – 44 тыһ. солкуобайы эрэннэрэн турар.
Ыспыраапка
Үлэ, социальнай сайдыы министиэристибэтн дааннайынан, 2019 сыл саҥатыгар дойду үрдүнэн 80 тыһыынча кэриҥэ бэтэрээн хаалбыт. Бу быһаччы сэриилэспит, хааннарын тохпут дьон.
Ону тэҥэ, “сэрии бэтэрээнигэр тэҥнэһэр” статустаах дьон бааллар – бу блокаданы туораабыттар, лааҕырдарга үлэлээбиттэр, сэрии оҕолоро. Кинилэр ахсааннара – 1,4 мөлүйүөн киһи.
Ангелина Васильева, “Саха сирэ” хаһыат, edersaas.ru