Аҕа дойду удуу сэриитин кыттыылаахтара Кыайыы 75 сылынан 100 тыһыынча солкуобайы тутуохтара. Ол туһунан СӨ бырабыыталыстыбатын бэрэссэдээтэлин солбуйааччы Ольга Балабкина тэлэбиидэнньэ биэриитигэр иһитиннэрдэ.
Өрөгөйдөөх Кыайыы 75 сылынан сибээстээн, 2020 сыл өрөспүүбүлүкэҕэ Дойдуга бэриниилээх буолуу сылынан биллэриллибитэ. Онон федеральнай уонна өрөспүүбүлүкэ бүддьүөтүттэн төлөбүрдэр бэриллиэхтэрэ.
Сэрии кыттыылаахтара уонна сэрии толоонугар өлбүт буойуттар огдооболоро – 100 тыһыынча солкуобайы, Ленинград блокадатын кыттыылаахтара, концлааҕырдарга, геттоларга хаайыллыбыт оҕолор – 30 тыһыынча солкуобайы, өлбүт бэтэрээннэр огдооболоро – 20 тыһыынча солкуобайы, тыыл бэтэрээннэрэ – 10 тыһыынча солкуобайы, сэрии кэмин оҕолоро – 3 тыһыынча солкуобайы ылыахтара.
Аҕа дойду улуу сэриитин кыттыылаахтарын ахсаана, билиҥҥи туругунан, 100 киһиэхэ тиийбэт. Кыайыыны уһансан, биһиги билиҥҥи эйэлээх олохпутун түстээбит ытык дьоммут, 90 саастарын ааспыт аарыма кырдьаҕастарбыт кэккэлэрэ сылтан сыл чарааһыыр… Кинилэргэ сүгүрүйүү, хорсун быһыыларын үйэтитэн, кэлэр көлүөнэлэргэ тиэрдии – биһиги ытык иэспит.
Ангелина Васильева, “Саха сирэ” хаһыат, edersaas.ru