Сунтаар улууһун олохтооҕо, Аҕа дойдуну көмүскүүр сэрии кыттыылааҕа Прокопий Афанасьевич Степановы бүгүн улуус салалтата Кыайыы күнүнэн эҕэрдэлээтэ.
Бүгүн, ыам ыйын 9 күнүгэр, Сунтаар улууһун баһылыга Анатолий Григорьев, баһылыгы социальнай уонна имиджевай бэлиитикэҕэ солбуйааччы Гаврил Еремеев уонна «Биир ньыгыл Арассыыйа» баартыйа Сунтаардааҕы салаатын сэкирэтээрэ, улуус аҕаларын түмсүүтүн бэрэссэдээтэлэ Борис Уларов сэрии бэтэрээнигэр ыалдьыттаатылар.
Прокопий Афанасьевичка Саха АССР 100 сылынан үбүлүөйдээх бэлиэни итиэннэ Сунтаарга икки хостоох дьиэ атыылаһарыгар 5 мөлүйүөн суумалаах туоһу суругу туттардылар.
Ытык кырдьаҕас Сунтаар улууһун Сиэйэтигэр олорор. Прокопий Степанов баара-суоҕа 19 саастааҕар сэриигэ бэбиэскэни туттан, Волховскай фронт Сибиирдээҕи 386-с стрелковай полкатыгар тиийэн сэриилэспитэ. 1942 сыл атырдьах ыйыгар бастакы бааһырыытын ылан, хас да ыйы быһа госпитальга эмтэммитэ. Ол кэннэ 8-с гвардейскай батальон састаабыгар, салгыы 1-кы Белорусскай фронт 283-с стрелковай полка 8-с гвардейскай батальонун састаабыгар киирсэн сэриилэспитэ. Кыайыы күнүн Прокопий Афанасьевич Берлиҥҥэ көрсүбүтэ.