Горнай улууһун Солоҕон нэһилигэгэр олорор Аҕа дойду Улуу сэриитин бэтэрээнэ Михаил Михайлович Дьячковскай 101 сааһын томточчу туолла. Ытык кырдьаҕаһы Саха сирин Ил Дархана Айсен Николаев уонна Горнай улууһун баһылыга Никита Андреев эҕэрдэлээтилэр.
«Михаил Михайлович сэриигэ барар бэбиэскэтин 1943 сыллаахха Бэрдьигэстээххэ сельсоветка үлэлии сылдьан туппут. Дьокуускайтан «Ленин» борохуотунан түөрт хонук устата айаннаан Усть-Кутка тиийбиттэр. Салгыы Иркутскайга диэри массыынанан айаннаабыттар. Араартааһыҥҥа Япония кыраныыссатыгар анаммыт. Онно 94-с стрелковай дивизияга автоматчигынан сулууспалаабыта. Ол сулууспалыы сылдьан атын дивизиялары кытта сыал ытыы куоталаһыытыгар иккис миэстэ буолан турардаах эбит.
1947 сыллаахха Улуу Кыайыыны илдьэ дойдутугар «Бойобуой үтүөлэрин иһин», «Японияны кыайыы иһин» мэтээллэрдээх төннүбүтэ. Кыайыыны уһансыбыт саллаат буоларын Аҕа дойду сэриитин II-с истиэпэннээх уордьана уонна Улуу Кыайыы үбүлүөйдээх мэтээллэрэ туоһулууллар. Сэрииттэн кэлээт, олоҕун үлэҕэ анаабыта. Үлэҕэ үрдүк ситиһиилэрин араас грамоталар, махтал суруктар көрдөрөллөр. «Коммунистическэй үлэ ударнига», «Социалистическэй куоталаһыы кыайыылааҕа», «Үлэ бэтэрээнэ» диэн наҕараадалардаах. Холкуоска, сопхуоска үлэлээбитин таһынан Солоҕон нэһилиэгэр кулууп, оскуола дьиэлэрэ дьэндэйэригэр сүҥкэн кылааттаах. Биэнсийэҕэ тахсыан иннинэ бэкээринэҕэ биэкэринэн үлэлээн, дэриэбинэ дьонун минньигэс килиэбинэн хааччыйбыта», — диэн эһээлэрин Михаил Михайлович Дьячковскай туһунан сиэннэрэ Юлия Осипова, Марианна Дьячковская кэпсииллэр.