Маны аах Уопсастыба

Сэрии бэтэрээнэ 100 сааһын туолла

Балаҕан ыйын 28 күнүгэр Аҕа дойду Улуу сэриитин кыттыылааҕа Любовь Николаевна Калабина 100 сааһын туолла. Үйэлээх үбүлүөйүнэн кинини үлэ, социальнай сайдыы миниистирэ Елена Волкова эҕэрдэлээтэ.

Любовь Николаевна 100 сааһын чөл туруктаах, үчүгэй настарыанньалаах көрсөр. Киниэхэ Ил Дархан аатыттан “Үйэ саас” бэлиэни, 100 тыһыынча солкуобайы туттардылар.

Сэрии бэтэрээнэ, Ленинград блокадатын кыттыылааҕа, СӨ сибээһин үтүөлээх үлэһитэ, Томпо улууһун уонна Хаандыга бөһүөлэгин Бочуоттаах олохтооҕо Любовь Николаевна Калабина (Толстоброва) 1921 сыл балаҕан ыйын 28 күнүгэр Нижегородскай уобаласка Малиновскай дэриэбинэтигэр төрөөбүтэ.

1942 сыл от ыйын 12 күнүгэр 20 саастаах кыысчаан Сэбиэскэй Аармыйа кэккэтигэр ыҥырыллыбыта. Кини зенитнэй-артиллерийскэй дивизион 253-с отделениетыгар разведчицанан, зенитчицанан сулууспалаабыта. Бу дивизион Ленинград куоракка аһы-үөлү, сэрии сэбин тиэрдэр тимир суолу ньиэмэс сөмөлүөттэриттэриттэн көмүскүүрэ. Эдэркээн зенитчица өстөөх 19 сөмөлүөтүн суулларбыта. 1945 сыл сайыныгар сэриини ефрейтор званиелаах түмүктээбитэ.

1960 сыллаахха Любовь Николаевна Хаандыгаҕа көһөн кэлэн, оройуоннааҕы сибээс тэрилтэтигэр 14 сыл устата үлэлээбитэ. Билигин Ангарскай куоракка кыыһыгар тиийэн олорор.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20