Тыа хаһаайыстыбатын министиэристибэтин (наркоматын) 98 сыллаах историятыгар кини киин аппараатыгар тыһыынчанан ахсааннаах араас идэлээх испэсэлиистэр, салайааччылар үлэлээн-хамнаан ааспыттара, тыа сирин сайдыытыгар тугунан да кэмнэммэт сүҥкэн кылааттарын киллэрбиттэрэ.
edersaas.ru
Аҕа дойдуну көмүскүүр Улуу сэрии сылларыгар Саха АССР Сири оҥорууга наркоматын аппараатыттан Кыһыл Аармыйа кэккэтигэр 64 үлэһит ыҥырыллан барбыта. Кинилэртэн уон буойун кэлэр көлүөнэлэр эйэлээх олоххо дьоллоохтук олороллорун, айымньылаахтык үлэлииллэрин-хамныылларын, оҕону-ыччаты тэнитэллэрин туһугар олохторун толук уурбуттара. Сэрии хонуутугар дьоруойдуу охтубуттар үтүө ааттара өлбөөдүйбэт. Дьыл-күн аастаҕын ахсын, сэриигэ ылбыт баастарыттан дьарҕаран ыалдьан итиэнэ кэм-кэрдии да кэлэн, бэтэрээннэр барахсаттар олохтон туораан иһэллэр. Билигин кинилэртэн саамай кииллэрэ, ыһыылара хаалан Улуу Кыайыы 75 сылын өрөгөйдөөх күнүн көрсөн эрэллэриттэн биһиги бары долгуйабыт, үөрэбит, уруйдуубут-айхаллыыбыт!
Биһиги ортобутугар билигин даҕаны күө-дьаа көрсүһэ, кэпсэтэ-ипсэтэ, олох үөрүйэхтэригэр үөрэтэ-такайа, сүбэлии-амалыы сылдьар уоттаах сэрии тыыннаах туоһута аарыма кырдаҕас буойун олоҕун кылгас кэрчиктэрин аҕалабыт.
Николай Никтитич билигин даҕаны күө-дьаа көрсүһэ, кэпсэтэ-ипсэтэ, олох үөрүйэхтэригэр үөрэтэ-такайа, сүбэлии-амалыы сылдьар.
Яковлев Николай Никитич 1926 с. Бүлүүгэ I Күүлэт нэһилиэгэр төрөөбүтэ. 1944 сыл от ыйыгар сэриигэ ыҥырыллан, I Украинскай фроҥҥа 21-с аармыйа 120-с стрелковай дивизиятын 543-с гвардейскай полкатын пулеметчигын иккис нүөмэринэн сылдьан кыырыктаах кыргыһыыларга кыттыбыта. Кыайыы кэнниттэн түөрт аҥаар сыл устата Чехословакияҕа, Австрияҕа, Венгрияҕа, онтон Белоруссияҕа десантнай чаастарга сулууспалаабыта. Аармыйаттан кэлээт, ССКП Бүлүүтээҕи райкомун пропагандаҕа уонна агитацияҕа салаатын инструкторынан үлэлээбитэ. Салгыы Бүлүүгэ, Үөһээ Бүлүүгэ райком сэкирэтээринэн, Абый, Саккырыыр, Уус Маайа оройуоннарыгар райсовет исполкомун бэрэссэдээтэлинэн тахсыылаахтык үлэлээбитэ. Кэлин, бочуоттаах сынньалаҥар тахсыар диэри, ССКП обкуомун, Саха АССР Миниистирдэрин Сэбиэтин инструкторынан үлэлээбитэ.
Николай Никитич Аҕа дойдуну көмүскүүр Улуу сэрии II истиэпэннээх уонна икки Бочуот Знага уордьаннарынан, отуттан тахса мэтээллэринэн, Саха АССР Үрдүкү Сэбиэтин Бочуотунай грамоталарынан наҕараадаламмыта. Кини Саха АССР норуотун хаһаайыстыбатын үтүөлээх үлэһитэ, Абый, Үөһээ Бүлүү оройуоннарын, Үөһээ Бүлүү оройуонун Далыр нэһилиэгин бочуоттаах олохтооҕо, Арассыыйа персональнай пенсионера.
Тыа хаһаайыстыбатын министиэристибэтин пресс-киинэ.
«Саха сирэ» хаһыат, edersaas.ru.