Сэргэлээх уопсайдарыгар 1298 бастакы куурус устудьуона олохсуйда

Эмиэ биир сайын биллибэккэ ааһан, Сэргэлээх сэргэхсийэ түстэ. Балаҕан ыйа, биллэрин курдук, үлэ, үөрэх саҕаланыытынан ааҕыллар. Ким устудьуоннуур кэрэ кэмнэри эргитиэн баҕарбатаҕай? “Устудьуон олоҕун толору билиэххин баҕарар буоллаххына, уопсайга олоруохтааххын”, – дииллэр. Онон хас биирдии саҥа үөрэнэ кэлбит оҕо Сэргэлээх уопсайыгар олорорун ыраланара саарбахтаммат.

Атырдьах ыйын бүтүүтэ Хотугулуу-Илиҥҥи федеральнай университет бастакы кууруһун устудьуоннарыгар 2019-2018 үөрэх дьылыгар уопсайга олоро киирэр бирикээстэрэ таҕыста. Уопсайдаммыт оҕолор аны түөрт-биэс сыл үөрэнэллэрин тухары устудьуон олоҕун толору билиэхтэрэ турдаҕа.

“Быйыл бастакы куурус 1298 устудьуона уопсайданна. Номнуо уопсайга олохсуйдулар. Кууруһуттан, үөрэҕиттэн тутулуга суох хас биирдии устудьуон уопсайга олороругар ыйга 945 солкуобайы төлүүр. Омук сириттэн кэлбит устудьуоннар эмиэ бу сууманы төлүүллэр, усулуобуйа барыларыгар биир”, — диэн ХИФУ устудьуоннарын куоратын дириэксийэтин регистрациялыыр уонна олохтуур сулууспатын начаалынньыга Михаил Яковлев иһитиннэрэр.

Сэргэлээххэ 15 уопсай дьиэ баар. Бу уопсайдар бары санитарнай уонна баһаарынай өттүнэн ирдэбиллэргэ эппиэттииллэр. Бу уопсайдарга улуустартан, Арассыыйа атын куораттарыттан уонна тас дойдулартан үөрэнэ кэлбит устудьуоннар олороллор.

Маны таһынан, 18-с куорпуска оҕо саада баар. Эдэр ыал үөрэнэр кэмнэригэр оҕолорун хаалларыахтарын сөп. Манна оҕону балтараатыттан ылаллар.

Ыйытык

Үөрэх дьылын бастакы нэдиэлэтин туһунан ыйытыкка ХИФУ устудьуоннара санааларын үллэстэллэр:

Сайыына Томская уонна Настя Диодорова, филологическай факультет II кууруһун устудьуоннара:

– Балаҕан ыйын 2 күнүттэн үөрэнэн саҕалаабыппыт, сайын устата үөрэнэрбитин ахтыбыт эбиппит. Уопсайга олорбоппут, дьиэттэн сылдьабыт. Бу үөрэх дьылыгар улахан туох да былааммыт суох, көстөн иһиэҕэ. Устудьуоннар идэлээх сойуустарыгар баарбыт, үөрэхтэн атын бириэмэбитин көхтөөхтүк уонна туһалаахтык атаарарга кыһаллабыт.

Сахаайа Федорова уонна Маша Данилова, геологоразведочнай факультет IV кууруһун устудьуоннара:

– Биһиги эрдэ 67-с уопсайга олорбуппут, быйыл 9/1 куорпуска көһөрдүлэр. Усулуобуйата быдан үчүгэй – хоско иккилии буолан олоробут, киэҥ-куоҥ куукуна, туттар мал-сал элбэх. Устудьуоннуур сылларбыт түмүктэнэн эрэр буолан, хас биирдии күммүтүн умнуллубаттык атаарыахпытын баҕарабыт. Сотору дьупулуом суруйуута саҕаланыаҕа.

Айтана Аммосова, «Саха сирэ» хаһыат, edersaas.ru