Сергей Местников: «Пандемия өрөспүүбүлүкэҕэ дистанционнай цифровой үөрэхтээһин сайдыытын түргэтэттэ»
Балаҕан ыйын 28 күнүгэр Хотугу пуорум чэрчитинэн Саха өрөспүүбүлүкэтин бырабыыталыстыбатын бэрэссэдээтэлин солбуйааччы э.т. Сергей Местников АРАССВА «COVID-19 пандемиятын кэнниттэн норуоттар икки ардыларынааҕы сибээһии сайыннарыы саҥа саҕахтара» диэн онлайн-сессиятыгар кытынна.
edersaas.ru
Санатар буоллахха, Саха сирэ Хотугулуу-Илиҥҥи Азия дойдуларын эрэгийиэннээҕи дьаһалталарын ассоциациятын (АРАССВА) 2018 сылтан салайан үлэлэтэр. Манна Арассыыйа, Япония, Кытай, Соҕуруу Корея, Кытай норуодунай өрөспүүбүлүкэтэ уонна Монголия киирэр.
Сергей Местников пандемия кэмигэр онлайн үөрэхтээһин туһунан иһитиннэрии оҥордо. Өрөспүүбүлүкэ киэҥ территориятыгар дистанционнай үөрэхтээһин кэккэ уустуктардаах диэн эттэ. «Саха сиригэр 800-тэн тахса уһуйаан, 649 оскуола, 43 орто анал уонна үрдүк үөрэх, 211 эбии үөрэхтээһин тэрилтэтэ баар. Мантан 70%-на тыа сиригэр үлэлиир буолан, сорох оскуолаларга суол-иис суоҕа харгыс буолар. Ол да буоллар, пандемия турбутугар өрөспүүбүлүкэҕэ цифровой инфраструктураны киллэрии күүскэ ыытыллыбыт буолан, төһө да сорох күчүмэҕэйдэри көрүстэрбит, интэриниэт бары нэһилиэнньэлээх пууҥҥа, үөрэх тэрилтэлэригэр киирэн турар. Өрөспүүбүлүкэҕэ 2018-2022 сылларга СӨ электроннай үөрэхтээһинин сайыннарыы Концепцията ылыллыбыта, электроннай үөрэхтээһин портала оҥоһуллубута», — диэн Сергей Васильевич Саха сиригэр үөрэхтээһин эйгэтигэр ыытыллар цифровизация олуктарын билиһиннэрдэ.
Сергей Местников: «Быйыл кулун тутарга ыксаллаах быһыыга-майгыга дьиэҕэ үөрэтэргэ күһэллибиппит. Бэрт кылгас кэм иһигэр хас биирдии ыалга түргэн тэтимнээх интэриниэт, ноутбук, планшет баар буоларын ситиспиппит. Кыаммат уонна элбэх оҕолоох ыалларга нуотбук, планшет түҥэппиппит. Итиэннэ эмиэ кылгас кэмҥэ педагогтарбыт таһымнарын үрдэтэр куурустары ыыппыппыт”, — диэн эттэ.
Билигин пандемия кэмигэр өрөспүүбүлүкэҕэ үөрэхтээһин үс мадьыалынан барар: үгэс буолбут киэбинэн үөрэтии, кэтэхтэн үөрэтии (дистанционнай) уонна аҥаардаан үөрэтии (икки ньыманы туттан). Сергей Местников этэринэн, бу ньымалар номнуо үөрэх бырассыаһыгар киирэн, дьон-сэргэ үөрэнэн, үөрэх дьыла этэҥҥэ саҕаланна.
Сергей Местников маны сэргэ эбии үөрэхтээһин, куруһуоктар эмиэ онлайн киэбинэн ыытыллаллар диэн бэлиэтээн эттэ.
Онно эбэн: «Пандемия өрөспүүбүлүкэҕэ дистанционнай цифровой үөрэхтээһин сайдыытын түргэтэттэ. Балаҕан ыйын 18 күнүнээҕи туругунан, дистанционнай үөрэх киэбигэр 46 322 үөрэнээччи көспүт. Онтон 9% — орто уопсай үөрэхтээһин үөрэнээччилэрэ, 75% — орто анал үөрэх кыһата, 74% — үөрдүк үөрэх устудьуоннара, магистраннара буолаллар. Туох да диэбит иһин, иннкитин оскуола цифровой технологията суох сатаммат. Хаачыстыбаннай үөрэхтээһин, биллэн турар, оҕо үөлээннээхтэрин кытта алтыһыытын эмиэ тэрийиэхтээх. Ону кэтэхтэн биэрэр кыах суох. Ол да буоллар цифровизация үөрэх ыырын, кыаҕын кэҥэтэр», — диэн Сергей Местников тоһоҕолоон эттэ.
Манна даҕатан эттэххэ, Саха Өрөспүүбүлүкэтэ пандемия кэмигэр үөрэх тиһигин быспакка, хаачыстыбалаах үөрэхтээһини тэрийбит Арассыыйа иһигэр биэс бастыҥ эрэгийиэн ахсааныгар киирбитэ.
СӨ Ил Дарханын уонна бырабыыталыстыбатын пресс-сулууспата.
Ирина Ханды бэлэмнээтэ.
Хаартыска: Андрей Сорокин