Соторутааҕыта Сунтаар улууһугар Тыа хаһаайыстыбатын министиэристибэтин көһө сылдьар кэллиэгийэтэ буолан ааста.
Миниистир Александр Атласов салайар мунньаҕар 100-тэн тахса киһи: улуустар баһылыктара, тыа хаһаайыстыбатын управлениеларын салайааччылара уонна исписэлиистэрэ, тыа хаһаайыстыбатын тэрилтэлэрин салайааччылара, кэллиэгийэ чилиэннэрэ кыттыыны ыллылар.
Кэллиэгийэҕэ саҥа усулуобуйаҕа бырабыыталыстыба уонна тустаах министиэристибэ агробырамыысыланнай комплексы өйөөһүҥҥэ ыытар үлэлэрин, племенной сүөһүнү иитиигэ соруктар, пиэрмэрдэр уонна тыа хаһаайыстыбатын кэпэрэтииптэприн үлэлэрин бэрээдэктээһин уонна да атын тирээн турар боппуруостары дьүүллэһии буолла.
Мунньахха СӨ Уопсастыбаннай палаататын тыа сирин сайдыытыгар, агробырамыысыланнай комплекска уонна бэйэни салайыныы хамыыһыйатын бэрэссэдээтэлэ Сергей Сюльскай кыттыыны ылла уонна кэккэ санаатын тиэртэ.
— Кэллиэгийэҕэ тыл этиибэр, төһө да уустук кыстык аастар, Тыа хаһаайыстыбатын министиэристибэтэ үлэни-хамнаһы сатабыллаахтык тэрийэн, быйылгы күөххэ бары хаһаайыстыбалар этэҥҥэ үктэммиттэрин бэлиэтээтим.
Сорох ыраах сытар улуустарга, нэһилиэктэргэ үүт тутар пууннар кэтэх хаһаайыстыбалар үүт туттарбат буолан, сабыллан тураллар. Онон үүт туттаралларыгар тымныы түһүөр диэри анал пууннары сөргүтэн, уоттарын-сылаастарын хааччыйар дьаһаллары ылыахха, үлэлиир штаттары көрүөххэ наада диэн этии киллэрдим.
Үлэбинэн Аллараа Халыма улууһугар сылдьыбытым. Онно «Турваургин» таба хаһаайыстыбатын табаһыттара ыстаадалара “туундара” категорияҕа киирсэрин, үлэлиир усулуобуйалара хайалаах сир буолан, “горно-таежная” категорияҕа киллэрэргэ туруорсубуттара. Ону тэҥэ хоту улуустар балыксыттара муксуун балыкка кубуота көрдүүллэр. Илимнэригэр муксуун киирэн хааллаҕына, иниспиэктэрдэр ыстырааптыыллар эбит. Онон муксуун элбээн, бу боппуруоһу быһаарар кэм кэлбит. Ити боппуруостары тыа хаһаайыстыбатын кэллиэгийэтигэр туруорустум. Ити курдук, кэллиэгийэҕэ тыа сирин суолталаах боппуруостарыгар санаабын тиэртим” , — диэн Сергей Сюльскай санаатын үллэһиннэ.
СӨ Уопсастыбаннай палаататын хамыыһыйатын салайааччыта Сергей Сюльскай “Кириэстээх” ТХПК ыанньыксыта Александра Никифороваҕа уонна Сунтаар улууһун Кириэстээх нэһилиэгин олохтооҕо, үлэ бэтэрээнигэр, “Кустук” уопсастыбаннай тэрилтэтин чилиэнэ Раиса Егороваҕа Уопсастыбаннай палаата Махтал суругун туттартаата.
Елена ПОТОЦКАЯ, “Саха сирэ” хаһыат.
Хаартыска — Сергей Сюльскай тиксэриитэ.