Сергей Шойгу ХИФУ иһинэн байыаннай үөрэх киинин тэрийэргэ соруйда

Ааптар: 
Бөлөххө киир:

Ыам ыйын 14 күнүгэр Российскай Федерация оборонатын миниистирэ Сергей Шойгу салалтатынан ыытыллыбыт Бүтүн Россиятааҕы селекторнай сүбэ мунньахха  СӨ Бырабыыталыстыбатын бэрэссэдээтэлэ Андрей Тарасенко кытынна. Мунньахха «Авангард» диэн ыччаты байыаннай- патриотическай иитии киинин регионнарга тэрийии боппуруоһун дьүүллэстилэр.

Оборона миниистирэ  «Авангард» киин үлэтэ — эрэгийиэҥҥэ ыччаты байыаннай сулууспаҕа бэлэмнииргэ төһүү буоларын бэлиэтээтэ.

Саха сиригэр «Авангард» киинэ кадеттар интэринээт-оскуолаларын баазатыгар тэриллэн үлэлиир. СӨ Бырабыыталыстыбатын бэрэссэдээтэлэ «Авангард»киин сайдыытыгар көмөлөһөрүгэр РФ оборонатын миниистириттэн көрдөстө. Сергей Шойгу көрдөһүүнү ылынан, Оборона министиэристибэтин  салалталара өйүүллэригэр, ону таһынан наадалаах тиэхиньикэнэн, үөрэх матырыйаалларынан хааччыйарга соруйда.

Андрей Тарасенко байыаннай кафедра сабыллыаҕыттан өрөспүүбүлүкэ үрдүк үөрэҕин кыһаларын устудьуоннара начальнай байыаннай бэлэмнэниини ылар кыахтара суоҕун бэлиэтээтэ. Сергей Шойгу көрдөһүүнү болҕомтоҕо ылан ХИФУ баазатыгар байыаннай үөрэх киинин арыйар туһунан Андрей Тарасенко этиитин өйөөтө. Илиҥҥи байыаннай уокурук хамандыырыгар  бу боппуруоһу быһаарарыгар уонна быйылгы үөрэх дьылыгар М.К.Аммосов аатынан ХИФУ баазатыгар байыаннай үөрэх киинин арыйарга  эттэ.

Сергей Шойгу байыаннай киин үлэтэ тэриллиитигэр уонна ыччаты патриотическай иитии боппуруостарыгар көхтөөхтүк кыттыбытын иһин СӨ Бырабыыталыстыбатыгар махталын биллэрдэ.

Дойду үрдүнэн барыта  27  «Авангард» лааҕыр сылы быһа тохтоло суох үлэлиир. Байыаннай- патриотическай кииннэргэ бастакы сүүмэрдээһин түмүгүнэн, дойду үрдүнэн наадалааҕын көрдөрдө. Ол курдук, байыаннай үөрэххэ уолаттар даҕаны, кыргыттар даҕаны үөрэниэхтэрин баҕаралларын биллэрдилэр.

Сергей Шойгу РФ Бэрэсидьиэнэ Владимир Путин сорудаҕынан байыаннай-патриотическай кииннэр 100 тыһ тахса нэһилиэнньэлээх куораттарга барыларыгар тэриллиэхтээхтэрин чопчулаата.

+1
0
+1
0
+1
0
+1
0
+1
0
+1
0
+1
0