Маны аах Уопсастыба

Сергей Рыбальченко: «Саха сирин нэһилиэнньэтэ 1 мөлүйүөн буолуоҕа»

Дьокуускайга VII Бүтүн Арассыыйатааҕы «Демографическое развитие Дальнего Востока и Арктики» диэн кэмпириэнсийэ буола турар. Элбэх эрэгийиэннэртэн 400 кыттааччы кэлэн уонна тыһыынчаттан тахса киһи онлайн-көрүҥүнэн кытыннылар.

“Научнай-уопсастыбаннай эспэртиисэ институтун генеральнай дириэктэрэ, РФ Уопсастыбаннай балаататын демографияҕа, дьиэ кэргэн сыаннастарын харыстааһыҥҥа хамыыһыйатын бэрэссэдээтэлэ  Сергей Рыбальченко санаатын бу курдук үллэһиннэ:

Бу кэмпириэнсийэ уратыта – федеральнай уокуруктарга демография боппуруостарыгар сыл аайы ыытыллар соҕотох тэрээһин буолар. Сыл аайы туох үлэ ыытыллыбытын ырытыы, үлэ түмүгүн таһаарыы, бастыҥ уопуту тарҕатыы буолар. Мин көрүүбэр, Уһук Илин эрэгийиэнэ демография боппуруостарын быһаарыыга бастыҥ уопуттаах. Холобур, Сахалиҥҥа төрөөһүнү өйүүргэ үчүгэй уопуттаах, Саха сиригэр төрөөһүнү, уһун үйэлэниини көҕүлүүргэ, өлүү ахсаанын намтатарга өйүүр бэртээхэй миэрэлэрдээх. Саха сирин нэһилиэнньэтэ 1 мөлүйүөн ахсааҥҥа тиийиэ диэн эрэнэбит.  

Үлэ уопутун, федеральнай миэрэлэр эрэгийиэннэргэ хайдах үлэлииллэри барытын ырытыһыахпыт, биир түмүккэ кэлиэхпит. Кэмпириэнсийэҕэ Уһук Илин бэрэстэбиитэллэрэ эрэ буолбакка, 15 эрэгийиэн кыттыбыта кэрэхсэбиллээх. Ол аата Уһук Илин эрэгийиэнэ сайдыытыгар бүтүн дойду интэриэстээх.

Кэмпириэнсийэҕэ 400 киһи кэлэн, 1 тыһыынчаттан тахса киһи онлайн-көрүҥүнэн кытта сылдьар. Уһук Илин 2025 сылга диэри демографическай бэлиитикэ кэнсиэпсийэтин уонна “Демография” национальнай бырайыак олоххо киириилэрин ырытыһыахтара.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

0
0
Telegram @edersaas20