Сергей Местников «Якутия» медиа-холдинг тэрилин саҥардарга сорудахтаата
СӨ Бырабыыталыстыбатын Бэрэссэдээтэлин солбуйааччы Сергей Местников Инновация министиэристибэтин салалтатын кытта «Якутия» АУо типографиятыгар сырытта, тэрилтэ үлэтин-хамнаһын көрдө-иһиттэ.
Оробуочай бөлөх ааспыт сыл түмүгүн билистэ, 2021 сылга үлэ былаанын дьүүллэстэ. Тэрилтэ дириэктэрин солбуйааччы Владимир Сыромятников «Якутия» медиа-холдинг кинигэ бородууксуйатын бэчээттээһин кээмэйин улаатыннарары былаанныырын эттэ. Бу туһунан СӨ Инновацияҕа, сыыппара сайдыытыгар уонна инфокоммуникационнай технология министиэристибэ пресс-сулууспат иһитиннэрдэ.
Владимир Сыромятников иһитиннэрбитинэн, 2020 сылга тэрилтэ сакааска үлэтин 62% -на хаһыаттары , 13%-на — кинигэ бородууксуйатын бэчээттээһин буолбут. Мунньахха кэпсэтии түмүгүнэн, Сергей Местников тэрилтэ үлэлиир тэрилин саҥардан биэрэргэ үлэлэһэр наадатын бэлиэтээтэ: «Бородууксуйа бэйэҕэ турар сыанатын (себестоимость) кыччатыахха наада. Ол инниттэн тэрили саҥардыы соруга турар. Биллэн турар, тэрили барытын биир кэмҥэ уларытар уустук. Онон билигин саамай туттуллар тэрили биирдиилээн уларытыахха сөп. Ааҕан-суоттаан, сылга оҥоһуллуохтаах бородууксуйа кээмэйин үөрэтэн баран, анал былаанна оҥостуҥ, — диэн сүбэлээтэ Бырабыыталыстыба Бэрэссэдээтэлин солбуйааччы. Маны таһынан, Сергей Местников «Якутия» медиа-холдинг салалтатыгар маркетинг бэлиитикэтигэр сонун сүүрээннэри толкуйдуулларыгар уонна типография 160 сыллаах үбүлүөйүн көрсө тэрили саҥардыыга тустаах былааны оҥорон киллэрэллэригэр сорудахтаата.
Елена ПОТОЦКАЯ, «Саха сирэ» хаһыат, edersaas.ru