Сергей Местников оскуолалар хапытаалынай өрөмүөннэрин быраграаматыгар улуустар баһылыктарын көхтөөхтүк кыттарга ыҥырда.
Оскуолаларга хапытаалынай өрөмүөнү оҥоруу бырагырааматыгар барыта 300 эбийиэк хабыллара былааннанар. Оттон билиҥҥитэ, 31 эрэ оскуола сөбүлэһии түмүгүн ылбыт. Бу туһунан РФ Үөрэх министиэристибэтин мунньаҕын түмүгүнэн, СИА СӨ вице-премьерэ Сергей Местников иһитиннэрбит. Кини маныаха улуустар баһылыктарын көхтөөхтүк кыттарга ыҥырбыт.
«Биһиги бу бырагыраамаҕа кыттарга сайаапка ыыппыппыт. Федеральнайтан үбүлээһин суотугар өрөспүүбүлүкэ 25 оскуолатыгар хапытаалынай өрөмүөнү ыытарга», — диэбит Сергей Местников.
Бэлиэтээн эттэххэ, Үөрэх министиэристибэтэ оскуолаларга хапытаалынай өрөмүөнү оҥорорго сайаапкалары ылыы болдьоҕун сэтинньи 25 күнүгэр диэри уһатан биэрбитин туһунан иһитиннэрбит.
«Ыйтан ордук кэм баар. Эспэртиисэ түмүгүн ылан баран, улуустар СӨ Үөрэх уонна наука министиэристибэтигэр сайаапкаларын ыытыахтаахтар. Сэтинньи 24 күнүгэр биһиги улуустартан киирбит сайаапкалары түмэбит уонна сайаапканы ситэрэн баран, 2023 сылга үбүлээһин бырагырааматыгар киллэттэрэргэ РФ Үөрэх министиэристибэтигэр ыытабыт«, — диэн этэр.
Сергей Местников оҕолор табыгастаах, тупсаҕай усулуобуйаҕа үөрэнэллэрин, хаачыстыбалаах үөрэҕи ылалларын туһугар докумуону хомуйууга улуустар баһылыктара көхтөөхтүк кытталларыгар, сайаапканы кэмигэр биэрэллэригэр ыҥырда.
+1
+1
+1
+1
+1
+1
+1