Бүгүн, олунньу 16 күнүгэр, видеокэмпириэнсийэ сибээһин нөҥүө СӨ бырабыыталыстыбатын бэрэссэдээтэлин солбуйааччы Сергей Местников саха тылын үөрэх тэрилтэлэригэр үөрэтиигэ туһуламмыт мунньаҕы ыытта.
Вице-премьер киирии тылын төрөөбүт тыл уонна сурук-бичик күнүн ааспыт нэдиэлэҕэ бэлиэтээһинтэн саҕалаата. Кини өрөспүүбүлүкэҕэ 2024 сылга диэри төрөөбүт уонна судаарыстыбаннай тылы сайыннарыыга судаарыстыбаннай бырагыраамма үлэлиирин иһитиннэрдэ. Саха тылын оскуолаларыгар төрөөбүт тылы үөрэтии туһунан СӨ үөрэх уонна наука миниистирэ Михаил Сивцев кэпсээтэ. 2020-2021 сыллардааҕы үөрэх дьылыгар 641 оскуолаттан 393 оскуола (60,6%) саха тылын үөрэтэр. Үөрэх былааныгар 225 оскуолаҕа саха тылын үөрэтии киирбит. Дьокуускайга 23 оскуолаҕа (50 оскуолаттан) 10445 оҕо үөрэнэр эбит. Биридимиэт быһыытынан саха тылын уонна литературатын 11 оскуола (4169 оҕо) үөрэтэр. Кини бэлиэтииринэн, төрөппүттэр оҕолорун сахалыы оскуолаҕа биэрээри сайаапка киллэрэллэриттэн, сахалыы кылаастар аһыллар кыахтаахтар диэтэ.
Ульяна Захарова, edersaas.ru