Сергей Местников оҕо сайыҥҥы лааҕырын тэрийии боппуруоһунан мунньах ыытта
СӨ Бырабыыталыстыбатын бэрэссэдээтэлин солбуйааччы Сергей Местников оҕо сайыҥҥы сынньалаҥын уонна доруобуйатын бөҕөргөтүүтүн боппуруоһунан мунньах ыытта.
Оҕо сайыҥҥы сынньалаҥар бэлэмнэнии үлэ туһунан үөрэх уонна наука миниистирин солбуйааччы Владимир Тихонов иһитиннэрдэ. Саха сирин үөрэнээччитин 75% уонна олох уустук балаһыанньатыгар түбэспит оҕолору 100 % сынньалаҥынан, доруобуйаны бөҕөргөтүүнэн уонна дьарыгынан хабар былааннаахтарын эттэ. Уопсайынан, былырыыҥҥы курдук 500 лааҕыры аһар былааннаахтар. Лааҕырга 50% оҕону сырытыннарар туһунан Роспотребнадзор ирдэбилэ баарын иһитиннэрдэ. Күн бүгүн бу хааччахтааһыны сымнатыыга туох даҕаны ыйыы суох. Өссө биир боппуруоһунан, оҕо сайыҥҥы сынньалаҥын тэрийиигэ үп-харчы суоҕа буолар. Бүгүҥҥүтэ тустаах сыалга анаан Үөрэх уонна наука министиэристибэтэ, уопсайа, 30 мөлүйүөн солкуобайы көрбүт. Өссө биир кыһалҕалаах боппуруос – өрөспүүбүлүкэ сынньалаҥ уонна үлэ лааҕырдарын материальнай-тиэхиньиическэй баазатын бөҕөргөтүүгэ (өрөмүөн) бүддьүөттэн 6 сыл устата үп көрүллүбэтэх.
Хамсык тарҕанар усулуобуйатыгар оҕо сынньалаҥын уонна доруобуйатын бөҕөргөтүүтүн тэрийиигэ санитарнай-эпидемиологическай ирдэбиллэр туһунан иһитиннэриини Роспотребнадзор Саха сиринээҕи управлениетын салайааччытын солбуйааччы Наталья Борисова оҥордо. Кини лааҕырга сылдьар оҕолортон ПЦР түмүгэ буолбакка, көннөрү мэдисиинэ ыспыраапката ирдэниэҕэ диэн бэлиэтээтэ.
СӨ физическэй култуураҕа уонна спорка министиэристибэтин салаатынан сайыҥҥы сынньалаҥҥа оҕолорго дьарыгы тэрийии туһунан салайааччы Иннокентий Григорьев билиһиннэрдэ. Кини өрөспүүбүлүкэ 4150-тан тахса оҕотун дьарыгынан хабар былааннаахтарын эттэ. Бу, эти-хааны эрчийиинэн уонна спордунан дьарыктанар оҕо ахсаанын 46% буолар.
Быйылгы сайыҥҥы сынньалаҥҥа оҕо доруобуйатын бөҕөргөтүүгэ мэдиссиинэ өттүнэн хааччыйыыны тэрийии туһунан СӨ доруобуйатын харыстабылын миниистирин бастакы солбуйааччы Алексей Яковлев иһитиннэрдэ. Оҕо доруобуйатын туругун уонна эпидемиологическай туругун (эпидемиологическое окружение) туһунан ыспыраапкалар бэриллиэхтэрэ диэн бэлиэтээтэ. Өрөспүүбүлүкэ тас өттүгэр барар оҕолору медицинскэй көрүү олоҕурбут көрүҥүнэн (очно) барыа диэн эттэ. Лааҕырдарга, өрүү буоларыныы, мэдиктэр үлэлиэхтэрэ.
Мунньах бүтүүтэ Сергей Местников, оҕо сайыҥҥы сынньалаҥын үбүлээһинин боппуруоһунан кэлэр нэдиэлэҕэ үп-харчы уонна экэниэмикэ министиэристибэлэрин бэрэстэбиитэллэр кыттыылаах туспа мунньаҕы тэрийэргэ сорудахтаата. Онон сибээстээн, бэрэссэдээтэли солбуйааччы тустаах сыалга үп-харчы көрүллүүтүгэр чопчу суоту уонна олохтоон этиини бэлэмнииргэ СӨ Үөрэҕин уонна наукатын министиэристибин эппиэтинэстээх үлэһиттэригэр сорудах биэрдэ.
Ону тэҥэ, Үөрэх уонна наука министиэристибэтэ Роспотребнадзору кытта кулун тутар 1 күнүгэр диэри, хамсык дьаҥынан хааччахтааһыны учуоттаан туран, сайыҥҥы лааҕырдары көрүҥнэринэн уонна оҕо ахсаанынан арааран испииһэктэрин оҥороллоругар эттэ.
Итини таһынан, Сергей Местников сылларынан арааран уонна ирдэнэр үптэрин ыйан туран өрөспүүбүлүкэ сайыҥҥы стационарнай лааҕырдарын саҥардыы былаанын оҥорорго ыйда. “Өрөспүүбүлүкэ сайыҥҥы стационарнай лааҕырдарын сыыйа саҥардан иһиэхтээхпит”, — диэн Сергей Васильевич сорудах туруорда.
СӨ Ил Дарханын уонна Бырабыыталыстыбатын пресс-сулууспата.
Хаартыска: Андрей СОРОКИН.