Сергей Местников Мэҥэ Хаҥаласка социальнай эбийиэктэри тутуу үлэтин бэрэбиэркэлээтэ
Өрөспүүбүлүкэ вице-премьерэ Сергей Местников эрэгийиэннээҕи бырабыыталыстыба дэлэгээссийэтин састаабын кытта Мэҥэ Хаҥалас улууһугар тутулла турар социальнай эбийиэктэри көрдө-иһиттэ. Бу эбийиэктэр «Үөрэхтээһин» уонна «Демография» национальнай бырайыактар чэрчилэринэн тутуллар.
Оробуочай сырыыга миниистирдэр Михаил Сивцев, Иннокентий Григорьев, тутуу миниистирин солбуйааччы Евгений Афанасьев уонна норуодунай дьокутаат Андрей Находкин кыттыыны ыллылар.
Дэлэгээссийэ бастаан Балыктаах сэлиэнньэтигэр сырытта. Манна 150 миэстэлээх оскуола тутуллар. Билиҥҥитэ үлэ 74 %-а толоруллубут: тас эркинин үлэтэ, вентиляция, уот холбооһунун үлэлэрэ ыытыллаллар. Оскуола 2021 сыл тохсунньутугар үлэҕэ киириэҕэ.
Салгыы дэлэгээссийэ чилиэннэрэ Аллараа Бэстээххэ тутулла турар спортивнай комплекс үлэтин көрдүлэр. Эбийиэккэ универсальнай саала, бассейн, сауна, мэдиссинискэй кабинет, теннистиир саала, дьарыктанар саала бааллар. Бу комплекска биир күҥҥэ 1 456 киһи дьарыктаныан сөп. Үлэ 87,4 % түмүктэммит.
Маны сэргэ оробуочай бөлөх Майаҕа Д.В.Ходулов аатынан Култуура киинигэр уонна Аллараа Бэстээххэ 240 миэстэлээх уһуйаан тутуутугар сырытта.
Түмүккэ дэлэгээссийэ улууска бара турар тутуу үлэтэ көхтөөҕүн, ол эрээри болдьоҕор ситиһэр туһуттан хонтуруолу күүһүрдэр наадатын бэлиэтээтэ.
edersaas.ru