Сергей Местниковтан Дьокуускай киинигэр археологическай хаһыылары ыытыы болдьоҕун уһатарга көрдөстүлэр
Дьокуускай куоракка Ярославскай уулуссаҕа ыытыллар Арктикатааҕы научнай-чинчийэр киин (АНЧК) археологическай хаһыыларыгар өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местников сырытта. Чинчийээччилэр XIX үйэ бүтүүтүнээҕи култуура араҥатыгар тиийбиттэрин көрдөрдүлэр.
Ыытыллар чинчийиилэр тустарынан АНЧК С.А.Федосеева аатынан Арктика археологиятын мусуойун научнай үлэһитэ Елена Соловьева кэпсээтэ. Исписэлиистэр от ыйыттан саҕалаан XIX үйэ бүтүүтүнээҕи култуура араҥатыгар тиийбиттэр. Хаспыт сирдэригэр бу кэмнээҕи дьиэ акылаатын булбуттар. Билигин тутууну архитектордар үөрэтэллэр. Онтон археологтар салгыы хаһыахтара.
Исписэлиистэр өссө миэтэрэ кэриҥи хаһарга соруктаналлар.
Ярославскай уулуссаҕа археологическай үлэлэр Арбитражнай суут саҥа дьиэтин тутар сиргэ ыытыллар. Бу сир учаастага дьон олорор дьиэтин тутар зонаҕа киирэр уонна манна неолит эпохатыгар (б.э.и. III–II тыһ.) археологическай артефактары булуохха сөп.
Балары учуоттаан, СӨ Култуура нэһилиэстибэтин эбийиэктэрин харыстааһыҥҥа департамент салайааччыта Николай Макаров уонна АНЧК дириэктэрэ Юрий Шипицын өрөспүүбүлүкэ бырабыыталыстыбатын бэрэссэдээтэлигэр археологическай үлэлэри ыытыы болдьоҕун биир ый уһатарга көрдөстүлэр. Сергей Местников наука бэрэстэбиитэллэрин этиилэрин сүрүннээн өйөөтө, диэн СӨ НА АНЧК пресс-сулууспата иһитиннэрэр.
Бэлэмнээтэ Женни СТРЮКОВА
Хаартыска: Алина Слепцова түһэриитэ