Муус саҥа туран эрэринэн сибээстээн, Саха сирин быыһыыр сулууспатын үлэһиттэрэ сэрэтэр-өйдөтөр, бэрэбиэркэлиир, көрөр рейдэлэргэ таҕыстылар.
edersaas.ru
Муус өссө даҕаны олус чараас. Түүнүн кыратык тоҥорбутун иһин, күнүһүн алларааттан уу бычалыйан, ириэрэн, төттөрү кэбирэтэр.
Бу кэмҥэ үксүн балыксыттар, массыыналаах дьон, оҕолор мууска тахсаллар. Хараҕы баайар мууска албыннатымаҥ, сэрэхтээх буолуҥ! Ууга былдьаныы биир сүрүн түрүөтүнэн итирэн баран, тугу да аахайбат буолбут дьон чараас мууска киириилэрэ буолар.
— Билигин оҕолор мууска тахсан оонньооботторун, мууһунан сылдьыбаттарын курдук, кэтээн ботурууллуубут. Киһини уйар 10 см халыҥнаах муус тура илик. Онон төрөппүттэр оҕолоругар бу кэмҥэ өйдөтүү оҥороллоро олус наадалаах, суолталаах. Оҕолор улахан дьон арыала суох уу кытыытыгар да чугаһаабаттара ордук.
Ону сэргэ, алтынньы 15 күнүттэн, өрөспүүбүлүкэ үрдүнэн дьоҕус суудуналарга уу суолунан сылдьыы түмүктэммитин туһунан өйдөтөбүт, — диир Быыһыыр сулууспа старшай дьуһуурунайа Сергей Кривошапкин.
Егор Карпов, «Саха сирэ» хаһыат, edersaas.ru