Сергей Иванов: «Биһиги сорукпут – өрөспүүбүлүкэ сайдыытыгар үлэлэһии»

Ааптар: 
Бөлөххө киир:

АЛРОСА хампаанньа Саха Өрөспүүбүлүкэтин социальнай-экэнэмиичэскэй сайдыытыгар киллэрбит кылаатын туһунан бастакы отчуот оҥоһулунна.

edersaas.ru

«Биһиги бу отчуоту бэйэбит баҕа өттүбүтүнэн, тугу оҥорбуппутун кэпсээри итиэннэ өрөспүүбүлүкэ олоҕор-дьаһаҕар хампаанньа ылар оруолун сыаналыыр соруктан оҥордубут. Саха сирэ мин сылдьыбыт сирдэрбиттэн саамай дьикти эрэгийиэн. Манна тыытыллыбатах айылҕа баар, манна бырамыысыланнас хампаанньалара үлэлииллэр. Сайын кылгас да буоллар, өҥүрүк куйаас түһэр, кыһын хас эмэ ый устатыгар бытарҕан тымныы турар. Бу тыйыс айылҕалаах хотугу кыраайга төрөөбүт дойдуларын таптыыр, сылаас сүрэхтээх, аһаҕас дууһалаах, үтүөкэн үлэһит дьоннор олороллор.

Номоххо кэпсэнэринэн, Таҥара илиитэ үлүйэн, саппыйатын түһэрэн кэбиһэн, Саха сирэ хостонор баайынан, ол иһигэр алмааһынан баай эбит. Саха алмааһа аан дойдуга киэҥник биллэр, үрдүк хаачыстыбатынан итиэннэ социальнай, экологическай эппиэтинэстээх буолуу бастыҥ уопутугар олоҕуран хостоноро-таҥастанара сыаналанар. Сир баайын хостуур хампаанньа үлэлиир сиригэр-уотугар эмсэҕэлээһини таһаарыа суохтаах.

Биһиги сорукпут киэҥ – баар кыахпытын туһанан өрөспүүбүлүкэ сайдыытыгар үлэлэһии. Ити иһин үлэ миэстэлэрин таһаарабыт, үлэһиттэрбитин дьоһун хамнаһынан, соцпакетынан хааччыйабыт, оҕо саадтарын, оскуолалары, балыыһалары, спорт эбийиэктэрин тутууга көмөлөһөбүт, нолуоктары төлүүбүт итиэннэ аахсыйалаахтарбытыгар (олортон саамай бөдөҥнөрө өрөспүүбүлүкэ) үрдүк дивидени биэрэбит. Ити барыта Саха сирин сайдыытыгар туһуланар. Бу 2010-2020 сыллары хабар отчуоту оҥорорбутугар коронавирустан уонна онтон үөскээбит кризистэн сылтаан, алмаас ырыынага уустук балаһыанньаҕа киирэ сылдьыбыта да, биһиги социальнай хайысхабыт онтон халбаҥнаабатаҕа. Ханнык да усулуобуйаҕа АЛРОСА дойдутун, Саха сирин, мэлдьи өйүүр уонна өрөспүүбүлүкэ олохтоохторо бу бөрүкүтэ суох кэми түргэнник умналларын, алмааһы симэх быһыытынан эрэ көрбөккө, кинини үгүс үтүө дьыалалары кытары ситимнииллэрин туһугар бары күүһүн уурар», – диэн хампаанньа генеральнай дириэктэрэ Сергей Иванов суруйар.

Раиса Сибирякова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0