Сергей Иванов: АЛРОСА Саха сирин социальнай-экэнэмиичэскэй сайдыытын салгыы өйүөҕэ
Сергей Иванов: АЛРОСА Саха сирин социальнай-экэнэмиичэскэй сайдыытын салгыы өйүөҕэ
Сааҥсыйаларынан сибээстээн АЛРОСА социальнай бырайыактара Саха сиригэр сарбыллыахтара суоҕа. Хампаанньа Өрөспүүбүлүкэ социальнай-экэнэмиичэскэй сайдыытын туһунан дуогабарынан тэрээһиннэри салгыы ыытыаҕа. Бу туһунан “АЛРОСА” генеральнай дириэктэрэ Сергей Иванов Саха сирин баһылыга Айсен Николаевы кытта көрсүһүүтүн түмүктэринэн иһитиннэрбитэ.
Өрүттэр нолуокка киллэриини сабаҕалааһыны, сыл бастакы аҥаарыгар үбү-харчыны чопчулааһыны, дивиденнэринэн былааны көрдүлэр. Кэпсэтии кэмигэр социальнай бырагыраамалары олоххо киллэриини, хампаанньа Саха сирин олоҕо-дьаһаҕа уонна экэниэмикэтэ сайдыытыгар кыттыытын дьүүллэстилэр.
Санаттахха, былырыын өрөспүүбүлүкэ уонна хампаанньа икки ардыларыгар 2025 сылга диэри Өрөспүүбүлүкэ социальнай-экэнэмиичэскэй сайдыытын туһунан дуогабарга илии баттаспыттара. Айсен Николаев эрдэ бэлиэтээбитинэн, “АЛРОСА Саха сирин олоҕор кыттыыта Саха сирин сайдыытын уонна өрөспүүбүлүкэ инники күөҥҥэ сылдьыытын хамсатааччынан буолар. Бу быстыспат сибээскэ уопсай ситиһиибит түстэнэр”.
АЛРОСА Саха Өрөспүүбүлүкэтин Кэлэр көлүөнэлэрин пуондатын салгыы өйүүр, өрөспүүбүлүкэҕэ саахалланар дьиэлэртэн көһөрүүгэ кыттар, мэдиссиинэ инфраструктуратын саҥардар, култуура уонна успуорт эбийиэктэрин тутар.
“Биһиги хас кыбаартал ахсын хампаанньа үбүлүүр саҥа эбийиэктэрэ аһыллалларын көрөбүт. Дуогабарга киирбит бары балаһыанньалар толору олоххо киирэллэр, биир да социальнай бырайыагы сарбыйбаппыт. Өрөспүүбүлүкэ салалтатын уонна олохтоохторун иннилэригэр ылыммыт эбэһээтэлистибэлэрбитин сыл бүтүөр диэри толоруохпут диэн эрэнэбин”, –АЛРОСА хампаанньа генеральнай дириэктэрэ бэлиэтээтэ.
Түмүккэ Сергей Иванов Саха сирин олохтоохторун Саха АССР сүүс сылынан эҕэрдэлээтэ уонна АЛРОСА сүрүн үлэни ыытар тэрилтэ быһыытынан хампаанньа Саха сиригэр оҥорор үлэтэ сыл ахсын үтүө түмүктээх буолуоҕа диэн эрэннэрдэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан