Күндү доҕоттор!
АЛРОСА элбэх омуктаах кэлэктиибин уонна тус бэйэм ааппыттан Саха сирин олохтоохторун Аан дойду төрүт норуоттарын аан дойдутааҕы күннэринэн эҕэрдэлиибин.
65 сыл тухары Саха сирин устуоруйата алмааһы хостуур салааны кытары быстыспат ситимнээх.
АЛРОСА тэриллиэҕиттэн ыла Хотугу сир төрүт норуоттарын олоҕор көхтөөхтүк кыттарга, табаһыттар уонна балыксыттар аҕа ууһунан общиналарын өйүүргэ, кинилэри үөрэтэн араас идэҕэ үлэҕэ ыларга дьулуһар. Биһиги өрөспүүбүлүкэни кытары Саха сирин төрүт норуоттарын тылларын харыстыыр, үгэстэрин уонна сыаннастарын, хатыламмат култуураларын cырдатар бырайыактары олоххо киллэрэбит.
Аҥаардас кэнники 10 сылга АЛРОСА үбүнэн Саха сирин улуустарыгар култуура 15 эбийиэгэ тутулунна, кинилэр хас биирдиилэрин үлэтэ омук үгэһин харыстааһыны кытары сибээстээх. Хампаанньа сыл аайы «Табаһыт күнүн» уонна аҕыйах ахсааннаах төрүт норуоттар олорор улуустарыгар Олоҥхо ыһыаҕын ыытыыны өйүүр, «Туой-Хайа» муусукаалынай бэстибээли тэрийэр, Саха сирин норуоттарын төрөөбүт тылларыгар кыһамньылаах сыһыаннаһыыга уонна харыстааһыҥҥа хайысхаламмыт бырайыактары олоххо киллэрэр. Былырыын АЛРОСА «Кындыкан» этно-култуурунай бырайыакка бииргэ үлэлээһээччинэн буолбута. Бырайыак сыала-соруга — Хотугу сир аҕыйах ахсааннаах төрүт норуоттарын олохторун үгэс буолбут укулаатын уонна ураты култуураларын харыстааһыҥҥа аан дойду уопсастыбаннаһын болҕомтотун тардыы.
Хотугу сир уонна өрөспүүбүлүкэ төрүт норуоттарын сайдыытын боппуруостарыгар эппиэтинэстээх сыһыан мэлдьи биһиги үлэбит төрүт суолталаах тускулунан буолуоҕа. Биһиги бары бэйэбит култуурабытын, үгэстэрбитин хаһан да умнубаппытыгар, өбүгэлэрбит тылларыгар, култуураларыгар, биһиги олорор уонна үлэлиир сирбитигэр ытыктабыллаахтык сыһыаннаһарбытыгар баҕарабын. Дьоллоох уонна чэгиэн-чэбдик буолуҥ!
АЛРОСА генеральнай дириэктэрэ Сергей ИВАНОВ