Бүгүн нуучча улуу бэйиэтэ Сергей Есенин төрөөбүтэ 125 сыла буолла
Бүгүн, алтынньы 3 күнүгэр, нуучча улуу бэйиэтэ Сергей Александрович Есенин төрөөбүтэ 125 сыла буолла.
Соторутааҕыта «Инстаграм» социальнай ситимҥэ Есенин страница арыммытын көрөн соһуйдум. Манна кини «сиэлпилии» турар, сыаналаах массыынаҕа олорор, түүҥҥү кулуупка, эрэстэрээҥҥэ сылдьар хаартыскалара бааллар.
Хасыһан билбитим, бу страницаны Тюменьскай уобаласка олорор учуутал Алия Исалимова оҥорбут эбит. Алия үрдүк үөрэҕи бүтэрэригэр дьупулуомугар Сергей Есенин айар үлэтин ырыппыт. Онтон ыла бэйиэт хоһооннорун сөбүлээн ааҕар буолбут.
«Инстаграмҥа бу сирэйи үөрэнээччилэрбэр уонна доҕотторбор анаан оҥорбутум. Онтон сыыйа-баайа билбэт дьонум сурутан барбыттара. Бастаан 1-2 тыһыынча киһи эбиллибитэ, кэлин элбээн барбыта (билигин 45 тыһыынчаттан тахса сурутааччылаах).
Оскуолаҕа үлэлии кэлбиппэр оҕолор кинигэни ааҕалларын сөбүлээбэттэр эбит диэн өйдөөбүтүм. Онон кинилэри ааҕыыга интэриэһи тардар сыаллаах, социальнай ситимҥэ Есенины уруһуйдуу-уруһуйдуубун, кини хоһооннорун уган саҕалаабытым. Ордук кыргыттар интэриэһиргииллэр эбит,» — диэн учуутал Исалимова иһитиннэрэр.
Маннык хабааннаах страницалар Маяковскайга, Бродскайга, Гогольга, Пушкиҥҥа анаан бааллар эбит. Оттон саха суруйааччыларын «инстаграмнаатахпытына» ыччат сахалыы кинигэни ааҕыыга интэриэһэ улаатыа дуо?
Айтана Аммосова, edersaas.ru