Сергей Бердник: «Саха сирин буоксата инникилээх»

Ааптар: 
Бөлөххө киир:

Арассыыйа буоксаҕа федерациятын тиэхиньиичэскэй делегата Сергей Николаевич Бердник Бороҕоҥҥо буола турар спартакиадаҕа буокса көрүҥэр үлэлиир. Кини манна судьуйалар үлэлэрин, уопсай тэрээһини, күрэхтэһии кэмигэр тахсар быһыыны-майгыны хонтуруоллуур аналлаах үлэлии сылдьар. 

Норуоттар икки ардыларынааҕы категориялаах судьуйа, араас таһымнаах күрэхтэһиилэр тиэхиньиичэскэй делегаттара Сергей Бердник спартакиада туһунан, Саха сирин буоксатын туһунан санаатын үллэһиннэ:

— Мин санаабар, манна күрэхтэһэ сылдьар спортсменнар бэйэлэрин таһымнарыгар эппиэттээбэт усулуобуйаларга күрэхтэһэ сылдаьллар. Буокса буола турар саалата олус итии, салгын тиийбэт. Боксердар икки раунду күрэхтэһэн баран, салгыннара тиийбэккэ сылайан эстэн хаалаллар. Ол даҕаны буоллар, олус тэрээһиннээх, өрө күүрүүлээх күрэхтэһии буола турар.

Мин Дьокуускайга буолбут Уһук Илин чөмпүйэнээтигэр эмиэ тиэхиньиичэскэй делегатынан үлэлээбитим. Онно күрэхтэһии киин куоракка ыытыллыбыт буолан, биллэн турар, быдан таһымнаахтык ааспыта.

Саха сирин боксердара Арассыыйа буоксатыгар лиидэрдэр быыстарыгар сылдьаллар. Георгий Балакшины үгүс ыччат холобур оҥостон улааппыта буолуо диэн саарбахтаабаппын. Кини Олимпиадаҕа кыттарыгар мин жюрига үлэлээбитим. Василий Егоров буоксаҕа өссө даҕаны көрдөрүүлэниэҕэ, инникилээх дии саныыбын. Кинилэри кытта Варламовы, Ивановы ааттаталыам этэ. Бу спартакиадаҕа кытта сылдьар Ян Алексеевы эмиэ бэркэ билэбин.

Саха сирин салайааччылара бу көрүҥү өйүүллэр. Буокса өрөспүүбүлүкэҕэ инникилээх.

Айтана Аммосова.

+1
0
+1
0
+1
0
+1
0
+1
0
+1
0
+1
0