Коронавирус сыстыганнаах дьаҥын кэмигэр Арктикатааҕы судаарыстыбаннай агротехнологическай университет учуонайдара сонун үүт бородууксуйа састаабын айан оҥордулар.
Манна баар “пропионовокислай” бактыарыйа киһи этигэр-хааныгар иҥэн, иммунитеты уонна киһи доруобуйатын бөҕөргөтөр эбит.
«Учуонайдар бэлиэтииллэринэн, “пропионовокислай” бактыарыйа В12 битэмиини күүскэ оҥорорунан биллэр. В12 битэмиин гемоглобин бэссэстибэлэрин атастаһыытыгар кыттар. Киһи коронавируһунан ыарыйдаҕына, гемоглобина түһэр, тыынара мөлтүүр, бэссэстибэлэр атастаһыыларын дьайыыта кэһиллэр. Онон дьаҥҥа ылларбат туһуттан, “Сэргэҕи” иһэ сылдьыахха наада. Киһи күн аайы истэҕинэ, чахчы доруобуйатыгар туһалаах диэн этэллэр. Аны экзополисахарида токсиннары ситимнээн, эттэн-хаантан таһаарар кыахтаах эбит», диэн университет пресс-киинэ иһитиннэрэр.
«Сэргэх» аһытыллыбыт үүт ас бородууксуйатын “ГорнайАс” кэпэрэтиип оҥорон таһаарар.
— Күҥҥэ 150-ча лиитэрэни оҥорон таһаарабыт. “Сэргэх” 7-8 чаас устата ситэр. Онон сарсыныгар атыыга тахсарга бэлэм буолар. Күн бүгүн сыата суох үүттэн оҥоробут. Атын маныаха ханыылыы үрүҥ астан оҥоһуллар утахтартан уратыта диэн, аһытыыта атын уонна пропионовокислай бактыарыйалартан турар, – диэн “Горнай Ас” кэпэрэтиип кылаабынай технолога Данил Сидоров кэпсиир. Кэпэрэтиип үлэһиттэрэ этэллэринэн, дьон бэйэ-бэйэлэриттэн дьэ истиһэн эрэллэр эбит. “Кэлин олох ханна баарын сураһан, төлөпүөннүү-төлөпүөннүү “Сэргэҕи” атыылаһаллар. Иһэн көрбүт дьон биһирээтилэр”, – диэн оҥорон таһаарар дьон быһыытынан горнайдар үөрүүлэрин үллэстэллэр.
«Сэргэх» «Сэргэлээх» устудьуоннар куораттарын маҕаһыыннарыгар атыыга баар. Бу бэрт интэриэһинэй үүт аһы оҥорбут учуонайдары кытта кэпсэтиини «Саха сирэ» хаһыат ааспыт чэппиэрдээҕи нүөмэригэр сиһилии ааҕыҥ.
Елена ПОТОЦКАЯ, «Саха сирэ» хаһыат.