Саха Өрөспүүбүлүкэтигэр билиҥҥитэ Африкатааҕы сибиинньэ чумаата (АЧС) суох эрээри, ураты сэрэхтээх буолар наада.
Балаҕан ыйыгар киин Арассыыйаҕа уонна Уһук Илиҥҥи федеральнай уокурук сорох эрэгийиэннэригэр Африкатааҕы сибиинньэ чумаатын куттала үөскээтэ. АЧС вируһун генома Амур, Владимир, Псков, Белгород уобаластарыгар уонна Еврей аптаныамынай уобалаһыгар көһүннэ. Күн бүгүн бу ыарыы 117 ачааҕа баар ( 82 – дьиэ сибиинньэтигэр, 35 – кыыл кабааҥҥа).
Саха Өрөспүүбүлүкэтигэр билиҥҥитэ АЧС суох эрээри, ыарыыны киллэрбэт туһуттан ураты сэрэхтээх буолар наада. Ити иһин сибиинньэлээх ыаллар уонна сибиинньэ хаһаайыстыбаларын салайааччылара, үлэһиттэрэ манныгы өйдүөхтээхтэр: бэтэринээринэй ирдэбиллэр толору тутуһуллуохтаахтар, сибиинньэ этин уонна сибиинньэ этиттэн оҥоһуллубут бородууксуйаны арыаллыыр бэтэринээринэй докумуона суох атыыга таһаарыллыбат, атыылаһыллыбат, атын эрэгийиэннэртэн арыаллыыр бэтэринээринэй докумуона суох сибиинньэ этин ылыллыбат, сибиинньэни аҕалыллыбат итиэннэ хаһаайыстыбаҕа туора дьону киллэриллибэт.
Сибиинньэлэри сабыылаах сиргэ тутуллар, таһырдьа дьаарбатыллыбат, атын сүөһүгэ чугаһатыллыбат итиэннэ буһарыллыбыт, оргутуллубут эрэ аһылыгынан аһатыллар. Ыарыы сибикитэ билиннэр эрэ, тута бэтэринээрдэргэ биллэриллэр. Бу туһунан Бэтэринээринэй уонна фитосанитарнай кэтээн көрүү федеральнай сулууспатын Саха сиринээҕи управлениета иһитиннэрэр.
Раиса Сибирякова, «Саха сирэ», edersaas.ru