Баһаары кэтээн көрөр судаарыстыбаннай сулууспа иниспиэктэрдэрэ лесничество үлэһиттэрин кытары нэһилиэнньэ ортотугар өйдөтөр-сэрэтэр үлэни ыыталлар, дьон сынньанар чугастааҕы тыаларыгар эриэйдэлэри тэрийэллэр.
edersaas.ru
Дьон сынньанар чугастааҕы тыаларыгар эриэйдэлэр муус устар 24 күнүттэн саҕалаан сайын устата ыытыллаллар. Өрөспүүбүлүкэ үрдүнэн 230 киһилээх 35 хонтуруоллуур бөлөх тэриллэн, баһаартан сэрэхтээх буолууга өйдөтөр-сэрэтэр дьаһаллар хас улуус ахсын бараллар. Бу кэм устата 250 эриэйдэ оҥоһулунна, 1600 киһини хабан баһаартан сэрэхтээх буолууга бэсиэдэ ыытылынна, нэһилиэнньэ тыаҕа тахсыытын хааччахтыырга 20 пост туруорулунна. Баһаартан сэрэхтээх буолуу быраабылаларын кэһии иһин 48 административнай боротокуол толоруллан, 16 гражданин уонна дуоһунастаах сирэй холбоон 144 тыһ. солк ыстарааптаннылар.
Ыам ыйын 15 күнүттэн Амма, Мэҥэ Хаҥалас, Нам, Таатта, Уус Алдан, Хаҥалас, Чурапчы уонна Дьокуускай к. лесничестволарын, ыам ыйын 18 күнүттэн Үөһээ Бүлүү, Бүлүү, Ньурба, Дьааҥы, Горнай, Өлүөхүмэ, Сангаар, Томпо, Уус Маайа лесничестволарын, ыам ыйын 22 күнүттэн Алдан, Эдьигээн, Индигир, Халыма, Ленскэй, Мирнэй, Нерюнгри уонна Сунтаар лесничестволарын сирдэригэр-уоттарыгар ойуур баһаара турар кутталлаах кэмэ саҕаланна.
Онон, ЫБММ пресс-сулууспата өрөспүүбүлүкэ ытыктабыллаах олохтоохторун уонна ыалдьыттарын, бөһүөлэк, бэйэ тиэргэнин иһигэр итиэннэ тыаҕа баһаартан сэрэхтээх буолуу быраабылаларын кыраҕытык тутуһаргытыгар, муҥутуур сэрэхтээх буоларгытыгар ыҥырар.
Раиса Сибирякова, «Саха сирэ» хаһыат, edersaas.ru