Серебрянай Борга эргэ дьиэлэри көтүрүү түмүктэммит

Ааптар: Эдэр Саас

Бөлөххө киир:

Ил Дархан бүгүн Нерюнгри оройуонугар үлэлиир. Санатар буоллахха, эрдэ Айсен Николаев Серебрянай Бор бөһүөлэгэр 4-с уонна 6-с кыбаарталлар эргэ дьиэлэрин көтүрэргэ сорудахтаабыта. Эргэ дьиэлэри көтүрэр туһунан олохтоохтор көрдөспүттэрэ.

Бүгүн Айсен Николаев баар балаһыанньаны кытта билистэ. Ол курдук, икки кыбаартал эргэ дьиэлэртэн ыраастаныллыбыт. «Социальнай ситимнэр көмөлөрүнэн быһа эпиирдии олордохпуна, бөһүөлэк олохтоохторо элбэх эргэ дьиэлэр туралларын туһунан этиммиттэрэ. Олору көтүрэргэ анаан үп көрүллүбүтэ. Быйыл бэс ыйыгар кэлэ сылдьан, оройуон салалтатыгар балаһыанньаны хонтуруолга ылалларыгар сорудахтаабытым», — диэн Айсен Сергеевич эттэ.

Ону тэҥэ, Айсен Николаев хаарбах туруктаах дьиэлэртэн дьону көһөрүү бырагырааматынан үлэ хаамыытын эмиэ билистэ. Серебрянай Борга эргэ дьиэлэри көтүрүүгэ уонна учаастактары оҥорууга өрөспүүбүлүкэ хааһанатыттан 17 мөл. солк. көрүллүбүт. Элбэх кыбартыыралаах үс дьиэҕэ суутунан быһаарсыы баара этэҥҥэ быһаарыллан, дьиэлэр муниципалитет бас билиитигэр бэриллибиттэр. Ил Дархан ити үлэни түмүктээн, балаҕан ыйын 10 күнүгэр диэри дьону саҥа дьиэлэргэ көһөрөргө сорудахтаата.

Санатар буоллахха, оройуон социальнай-экэнэмиичэскэй сайдыытын былаанынан Серебрянай Борга 2026 сылга диэри 2 км уһуннаах суол аспаалланыллыаҕа. Хаарбах дьиэттэн дьону көһөрүү бырагырааматын чэрчитинэн, Нерюнгри оройуонун үрдүнэн 2025 сылга диэри элбэх кыбартыыралаах 186 дьиэ көтүрүллүөхтээх.