Сербия уонна Саха сирин ыччата бииргэ үлэлэһэр туһунан сөбүлэҥ түһэристилэр

Бу күннэргэ Сербияҕа «Биир толкуй» диэн улуу суруйааччыбыт Алексей Кулаковскайга – Өксөкүлээх Өлөксөйгө уонна сиэрб тылын көҕүлээччи Вук Караджичка аналлаах норуоттар икки ардыларынааҕы бырайыак чэрчитинэн Саха сирин делегациятын кытта «Амма кырдалын ыччата», «Кулаковскай эргимтэтэ», «Кулаковскай нэһилиэстибэтэ» түмсүүлэртэн, Саха сирин дьахталларын сойууһун ыччакка аналлаах салаатыттан, СӨ национальнай архыыбыттан уонна Саха сирин норуоттарын музыкатын уонна фольклорун түмэлин аатыттан ыччат бөлөҕө үлэлиир.

Бу бырайыак литературнай-историческай суолталаах буолан, делегацияҕа эдэр суруйааччылар, өрөспүүбүлүкэ архыыбын уонна түмэлин үлэһиттэрэ киирэн биир идэлээхтэрин кытта үлэ үөрүйэҕин үллэстэ, санаа атастаһа, кэскиллээҕи кэрэһилии сылдьаллар.

Ыччат бөлөҕүн «Кулаковскай эргимтэтэ» уопсастыбаннай түмсүү салайааччыта Прокопий Бубякин сүрүннүүр. Тэрээһиҥҥэ Сербия Национальнай Ассоциациятын канцеляриятын ыччата ыкса үлэлээтэ. Көрсүһүү модераторынан «Вальево» диэн сиэрб-нуучча доҕордоһуутун уопсастыбатын бэрэссэдээтэлэ Милош Ковачевич буолла. Сербия ыччатын министиэристибэтин аатыттан Дземалудин Буко Паукинак кыттыыны ылла.

Кулун тутар 28 күнүгэр Саха сиригэр уонна Сербияҕа историческай суолталаах тэрээһин буолла. «Вальево» диэн сиэрб-нуучча доҕордоһуутун уопсастыбата уонна «Кулаковскай эргимтэтэ» уопсастыбаннай түмсүү духуобунас уонна култуура хайысхатыгар бииргэ үлэлэһэр туһунан сөбүлэҥ түһэристилэр. Өрүттэр литература, архыып уонна түмэл инники кэскилин, сайдар саҕахтарын дьүүллэстилэр. Бу күннэргэ эдэр үлэһиттэрбит Сербия култууратын эйгэтигэр айа-тута сылдьар саастыылаахтарын кытта билсиэхтэрэ, култуура уонна духуобунас хайысхатыгар уопут атастаһыахтара. Сербия ыччатын кытта мунньахха «Биир толкуй» бырайыагы салгыы сайыннаран, Вук Караджичка уонна Алексей Кулаковскайга аналлаах виртуальнай түмэли уонна архыыбы тэрийэр, саха уонна сиэрб литератураларын киэҥ эйгэҕэ сырдатар үлэни көҕүлүүр туһунан кэпсэттилэр.

Сардаана Сыромятникова,

«Саха сирэ» хаһыакка, edersaas.ru саайтка анаан.