Бу күннэргэ ыраах Сербияҕа аан бастакытын ыһыах ыытыллан, олохтоохторго саха төрүт үгэстэрин, култууратын, сиэрин-туомун билиһиннэрэн, ыллаан-туойан, оһуокайы оройуттан туттулар.
Оһуокайдьыт, суруналыыс Марта Николаева «Эдэр саас» сайтка кэпсээбитинэн, Сербияҕа ыытыллыбыт ыһыах Саха сирэ Россия састаабыгар киирбитэ 385 уонна саха литературатын төрүттээччи А.Е. Кулаковскай-Өксөкүлээх Өлөксөй төрөөбүтэ 140 сылыгар анаммыт. Прогар куорат Бойцинскай пааркатыгар ыытыллыбыт ыһыахха Саха сирин дэлэгээссийэтэ, ол иһигэр «Дьүрүһүй», «Эрэл» ансаамбыллар, «Оһуокай» түмсүү итиэннэ Англияҕа, Бельгияҕа, Германияҕа уонна да атын дойдуларга олорор сахалар кыттыыны ылбыттар.
– Оһуокайы ордук сэргээн, омугуттан тутулуга суох, бары оһуокайдаан, дууһалыын сынньаннылар. Оһуокай Далбар хотуттарын мааны сахалыы таҥастарын,көмүстэн симэхтэрин бары сөхтүлэр.
Бэс ыйын 11 күнүгэр «Русский дом» тэрээһинигэр СӨ Тас сибээскэ департаменын салайааччыта Владимир Васильев Саха сирин туһунан презентацияны оҥордо. Нөҥүө күнүгэр дэлэгээссийэ Белград куорат скупщинатын бэрэссэдээтэлэ Никола Николевич приемугар сырытта, – диэн Марта Николаева кэпсээтэ.
Анивера Акимова, «Саха сирэ» хаһыат, https://edersaas.ru/