РТКОММ хампаанньа Дьокуускайга SenSat диэн дьиэҕэ уонна үлэҕэ холбонор спутниковай түргэн интэриниэт ситимин билиһиннэрдэ. РТКОММ хампаанньа “Ростелеком” тэрилтэ иһинэн үлэлиир.
SenSat интэриниэт өҥөтө Саха сирин бары территориятынан тарҕанар. Биир тарыыбынан үлэлиир саҥа өҥөҕө уһук хоту улуустар судургутук холбонуохтарын сөп буолла.
Бу туһунан үөрүүлээх сонуну ааспыт нэдиэлэҕэ пресс-кэмпириэнсийэ кэмигэр суруналыыстары уонна блогердары кытта көрсүһүүгэ иһитиннэрдилэр. РТКОММ бэрэстэбиитэллэрэ саҥа өҥө тоҕо маннык ааттаммытын, кимнээххэ анаммытын уонна ырыынак эйгэтигэр хайдах тарҕанарын туһунан сиһилии кэпсээтилэр.
РТКОММ коммерческэй дириэктэрэ Михаил Муттерперл SenSat спутниковай интэриниэти туһанааччыларынан оптическай инфраструктура улаханнык сайдыбатах, куорат таһыгар турар чааһынай дьиэлээх дьон буолалларын эттэ.
Михаил Муттерперл SenSat маарканы киэҥник тарҕатыы хайысхаларын туһунан маннык бэлиэтиир: “SenSat ырыынакка саҥа өҥө буоларын быһыытынан, бастатан туран, биһиги бу өҥө туһунан спутниковай интэриниэт саҥа кыахтаммытын туһунан дьон билиитин ситиһиэхтээхпит”.
Маны таһынан, коммерческай дириэктэр SenSat диэн саҥа айыллыбыт тыл буоларын иһитиннэрдэ. Англиялыы sensation (сенсация) уонна satellite (спутник) диэн тыллары холбоон таһаарбыттар эбит. “Бу икки тылы холбуу суруйдубут, тоҕо диэтэххэ саҥа тылы истибит киһиэхэ өйүгэр тута “сенсацияны” кытта технологическай сайдыы өйдөбүлэ кэлиэхтээх”, — диэтэ Михаил Муттерперл.
Михаил Муттерперл суруналыыстарга тарыыптар тустарынан: “Интэриниэти дьиэҕэ холбуур тэрили бас билиигитигэр атыылаһыаххытын баҕарар буоллаххытына, билигин саҥа дьыллааҕы “Цена без правил”* диэн аахсыйа буола турар. Манан тэрили 9 900 — 20 000 солкуобайга атыылаһыаххытын сөп, бу сыана тэрил көрүҥүттэн тутулуктаах. Сөкүүндэҕэ 45 мегабайты хачайдыыр түргэннээх интэриниэт өҥөтүн туһанаргыт иһин ыйга 670 солкуобайы (тарыып аайы сыаната уларыйар) төлүүгүт”, — диэн сиһилии кэпсээтэ.
Эрэгийиэҥҥэ SenSat өҥө инникилээҕин туһунан кэпсээн баран, Михаил Муттерперл: “Саха сиригэр номнуо бастакы холбонооччулар бааллар. Хас да киһи маннык интэриниэт баарын истээт, тута холбоммута. Куорат таһыгар олорор дьон электроннай почтаҕа уонна социальнай ситимнэргэ киирээри холбоммута. Бу курдук куораттан тэйиччи, инфраструктура сайдыбатах эбэтэр уустук суоллаах сиргэ турар баазалаах урбаанньыттар биһиги интэриниэппит өҥөтүнэн туһаныахтарын сөп”, — диэн кэпсээтэ.
Эрэгийиэн олохтоохторугар саҥа өҥө наадалаах буолуоҕун туһунан СӨ Инновацияҕа, цифровой сайдыыга уонна инфокоммуникационнай технологияларга миниистири солбуйааччы Евгений Макаров кэпсээтэ. Интэриниэккэ киирэргэ саҥа провайдер өҥөтө эрэгийиэҥҥэ кэлбитинэн эҕэрдэлээтэ уонна санаатын эттэ:
— Ааспыт сылга РТКОММ хампаанньалыын өрөспүүбүлүкэ Арктика сиригэр баар сүүсчэ оскуолатыгар интэриниэт киллэрбиппит, олус элбэх үтүө харда тыллары туппуппут. Саха сиригэр спутниковай интэриниэт сибээс биир сүрүн көрүҥүнэн буолар. Ол курдук, өҥөнү федеральнай уонна өрөспүүбүлүкэтээҕи сибээс оператордара хааччыйаллар. Саха сиригэр саҥа өҥөлөр уонна тарыыптар кэлэллэрин биһириибит. Биллэн турар, оператордар истэригэр күрэс баар буолуо, оччотугар сибээс хаачыстыбата сайдыа уонна хабар сирин иэнэ кэҥиэ буоллаҕа.
Тэрээһиҥҥэ эспиэр быһыытынан кэлбит “Ростелеком” тэрилтэ Сахателеком филиалын дириэктэрэ Константин Войтеховский санаатын үллэһиннэ:
— Саха сирин киин сириттэн ыраах баар нэһилиэктэргэ спутниковай интэриниэтинэн эрэ сибээстэһэллэр. РТКОММ хампаанньаны кытта үлэбитин холбоон, Саха сирин бары муннугун интэриниэттиир кыахтанныбыт. Оччотугар олохтоохтор куораттан итэҕэһэ суохтук аныгылыы араас цифровой өҥөлөрүнэн туттар кыахтаныахтара этэ.
SenSat спутниковай интэриниэт кэмпилиэгин сакаастаан ылыахха сөп. Дьиэҕэ диэри аҕалан биэрии сыаната тарҕатар сулууспа тарыыптарыттан тутулуктаах эбэтэр официальнай дилер көмөтүнэн бэйэҕит сакаастыаххытын сөп.
SenSat түргэн спутниковай интэриниэт туһунан сиһилии www.sensat.ru саайтан билиэххитин, итиэннэ холбонуон баҕалаахтар саайт нөҥүө сайаапкалары хаалларыаххытын сөп.
* «Цена без правил» аахсыйа бу сыл алтынньы 10 күнүттэн ахсынньы 27 күнүгэр диэри ыытыллар. Сиһилии: https://www.sensat.ru/actions/3880/
* * *
РТКОММ (100% “Ростелеком” тэрилтэ иһинэн тэриллибит уопсастыба, спутниковай сибээс кэмпитиэнсийэлэрин киинэ) – Арассыыйа үрдүнэн үлэлиир спутниковай сибээс оператора.
РТКОММ Арассыыйа биир саамай элбэх салаалаах спутниковай ситимнээх тэрилтэтэ буолан туран, уустук суоллаах-иистээх, киин сиртэн тэйиччи турар, суотабай сибээс мөлтөхтүк хабар сирдэригэр сибээс өҥөтүн тиэрдэр.
РТКОММ тарҕатар сибээһинэн филиаллара киэҥник тарҕаммыт тэрилтэлэр туһаналлар. Ол курдук, РТКОММ хампаанньаларын бөлөҕөр урбаан тирэхтээх, сайдыылаах буоларыгар үлэлиир тэрилтэлэр киирэллэр.
РТКОММ хампаанньа SenSat диэн аатынан спутниковай түргэн интэриниэти тарҕатар.
Айтана Аммосова, edersaas.ru
Хаартыскалар уонна видеолар
хампаанньа архыыбыттан.