Семён Яковлев: «Нам улууһугар турбут ойуур баһаара Дьокуускайга суоһуурун туһунан сурах омуннаах»
Нам улууһун Таастаах нэһилиэгэр турбут ойуур баһаара Дьокуускайга суоһуурун туһунан иһитиннэрэр сириэстибэлэринэн тарҕаммыт сурах омуннаах диэн экология, айылҕаны туһаныы уонна ойуур хаһаайыстыбатын миниистирин э.т. Семён Яковлев этэр.
Бүгүҥҥү туругунан өрөспүүбүлүкэ 18 улууһугар 69 ойуур баһаарын умуруорууга үлэ барар. Баһаары бохсууга 4 216 киһи, 650 тиэхиньикэ үлэлии сылдьар. Удачнай куорат «Полярнай» аэропордугар базалаах Бе-200 уонна Ил-76 сөмөлүөттэр халлаан туругуттан көрөн, Бүлүү эргин улуустарга үлэлиэхтэрэ. Оттон Арассыыйа ЫБММ уонна Оборуона министиэристибэтин Ми-8 бөртөлүөттэрэ киин улуустарга сылдьыахтара.
Горнай, Кэбээйи, Нам, Таатта уонна Уус Алдан улуустарыгар балаһыанньа билигин да тыҥааһыннаах. Бүгүн киин улуустарга сөкүүндэҕэ 10-15 миэтэрэ тыаллаах.
– Ордук уустук быһыы-майгы Нам улууһун Таастааҕар (Өргөлөөҕөр) уонна Фрунзетыгар үөскээтэ. Бэҕэһээ киэһэ байыаннай тиэхиньикэҕэ сороҕун Намҥа ыытарга быһаарыллыбыта. Бүгүн уоту умуруоруу үлэтин бырабыыталыстыба бастакы вице-премьерэ Дмитрий Садовников салайа сылдьар. Байыаннай тиэхиньикэ баһаарынайдар утары уоту ыыталларыгар туһаныллыаҕа, – диэтэ Семен Яковлев.
Байыаннай тиэхиньикэ сороҕо Бэс Күөлгэ үлэлии сылдьар. Онно Оборуона министиэристибэтин 128 байыастаах холбоһуктаах инженернэй чааһын ротата базаланан турар.
– Өргөлөөх уонна Фрунзе нэһилиэнньэлээх пууннарыгар суоһаабыт уот уҥа салаата Дьокуускай туһаайытынан сыҕарыйда. Ону бохсууга улахан күүс быраҕылынна, онон куоракка уот суоһаабат, – диэн Семён Яковлев тоһоҕолоон бэлиэтээтэ. Бу туһунан Ил Дархан уонна бырабыыталыстыба пресс-сулууспата иһитиннэрэр.
Раиса Сибирякова, «Саха сирэ», edersaas.ru