Семеновтар 30 тыһыынча солкуобайы туттулар
Олох-дьаһах - Саха ыала

Семеновтар 30 тыһыынча солкуобайы туттулар

Түөрт оҕолоох Семеновтар Оҕо көмүскэлин күнүгэр бэрэсидьиэн Владимир Путинтан дьоһун бэлэҕи туттулар. Ол курдук бу күн ийэлэрин каартатыгар 30 тыһыынча солкуобай кэлэн түстэ.

edersaas.ru

Үгүс ыалларга бу күн 3-15 саастаах хас биирдии оҕоҕо 10 тыһыынча солкуобай бэриллэн, соһуччу үөрүү буолла, тоҕо диэтэр, бачча түргэнник түһүө диэн кэтэспэтэхтэр эбит. Социальнай ситимнэргэ көрдөххө, үгүстэр оҕолорун үөрдэ-көтүтэ бэлэсипиэт, бассейн, гироскутер, о.д.а. ылан биэрдилэр. Биллэн турар, бу оҕо өр кэмҥэ баҕарбыт, кэтэспит бэлэҕэ буолар. Уустук кэмҥэ ыал эрэ барыта сыаналаах малы ылар кыаҕа суох буоллаҕа.

Оттон Семеновтар хайдах дьаһаммыттар?

Биһиги быйыл учаастакпытыгар дьиэ, даача туттар былааннаахпыт. Учаастагы элбэх оҕолоохтор ахсааннарыгар киирэн, ылбыппыт. Онон туох баар чорбойбут харчыбытын барытын ууран иһэбит, мунньабыт. Быйыл хаһааҥҥытааҕар да, хас биирдии ыалга күөх оттоох тэлгэһэ, сайыҥҥы дьиэ наадалааҕа көһүннэ дии саныыбын. Онон өр сыллаах баҕа санаабытын толорор былаан баар. Бу 30 тыһыынча солкуобайы үөрэ-көтө “копилкабытыгар” уктубут. Оҕолор тэлгэһэҕэ оонньоон, сүүрэн-көтөн, абыраныах этилэр.

3-7 саастаах оҕолорго бэриллиэхтээх ыйдааҕы босуобуйаҕа сайабылыанньаны биэрбиппит. Биһиги икки оҕобут хапсаллар. Тохсунньуттан саҕалаан мунньуллан кэлэр дииллэр, онон кэтэһэбит. Судаарыстыба элбэх оҕолоох дьиэ кэргэттэргэ көмөлөһөрүгэр махтанабыт. Көмө, хаһааҥҥытааҕар да, билигин наада, — диэн ийэлэрэ Светлана Кимовна төлөпүөнүнэн кэпсээтэ.

Санатар буоллахха, 3-7 саастаах оҕолорго босуобуйа кээмэйэ: ый аайы 8,6-10,2 тыһыынча солкуобай. Маны хас биирдии чилиэнигэр тиксэринэн тиийинэн олоруу алын кээмэйиттэн намыһах дохуоттаах дьиэ кэргэттэр ылар бырааптаахтар. Билиҥҥи туругунан, 25 тыһыынча дьиэ кэргэн сайабылыанньа биэрбит.

Ангелина Васильева, “Саха сирэ” хаһыат, edersaas.ru

Хаартыска: интэриниэттэн

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

два × 1 =