Семен Винокуров «Полярные авиалинии» хампаанньаны салайыаҕа
Бүгүн Семен Винокуров тырааныспар уонна суол хаһаайыстыбатын миниистирин дуоһунаһыттан босхолонно. Бэнидиэнньиктэн «Полярные авиалинии» авиа-хампаанньаҕа генеральнай дириэктэринэн үлэлии тахсар.
edersaas.ru
«Госсулууспаттан барыахпын баҕарбытым ыраатта. Бырабыыталыстыбаҕа өр үлэлээтим. Авиа-хампаанньаҕа элбэх былааннаахпын. Бастатан туран, авиапаарканы саҥардыахпыт, дьоҕус авиацияны сайыннарыахпыт«, — диэн этэр Семен Викторович.
ЫСПЫРААПКА:
Семен Винокуров 1978 с. Уус Алдан Бороҕонугар төрөөбүт. 1997 с. И.И.Фадеев аатынан финансовай коллеһы, 2000 с. М.К. Аммосов аатынан СГУ-ну, 2010 с. РФ бэрэсидьиэнин иһинэн судаарыстыбаннай сулууспа академиятын бүтэрбит.
1997-2000 сс. Томпо улууһугар нолуок иниспиэксийэтигэр үлэлээбит;
2000 с. СӨ материальнай баай, атыы-эргиэн, тырааныспар уонна сибээс министиэристибэтигэр сүрүн исписэлиис;
2000-2002 сс. СӨ экэниэмикэтин министиэристибэтигэр үлэлээбит;
2002-2005 сс. СӨ тырааныспар, сибээс уонна информатизация министиэристибэтин экэниэмикэҕэ салаатын салайааччыта;
2005-2010 сс. СӨ сыана бэлиитикэтин судаарыстыбаннай кэмитиэтин бэрэссэдээтэлин солбуйааччы;
2010 с. — «ЛОРП» хампаанньа генеральнай дириэктэрин экэниэмикэҕэ солбуйааччы;
2010-2011 сс. СӨ тырааныспарын, сибээһин уонна информатизациятын миниистирэ;
2011-2018 сс. СӨ тырааныспарын уонна суол хаһаайыстыбатын миниистирэ.
Николай Попов, «Саха сирэ» хаһыат, edersaas.ru