Үөһээ Бүлүү улууһун Тамалакаан с. саха норуодунай суруйааччыта, бэйиэт, прозаик, тылбаасчыт Семен Руфов төрөөбүтэ 90 сылыгар аналлаах Ыһыах ыһылынна.
edersaas.ru
Бэс ыйын 14 күнүгэр Орто Күөл алааска ыытыллыбыт үрүҥ тунах Ыһыаҕы Семен Титович уонна Мария Арбыкина ааттарын үйэтитэр пуонда уонна Тамалакаан муниципальнай тэриллии иилээн-саҕалаан тэрийдилэр.
Ыһыах кэмигэр Семен Титович тылларыгар саҥа ырыалар ылланнылар. Эстрада артыыстара Лэгэнтэй — «Ийэ тылбар», Айаал Кириллин-Күндэл — В.Петров матыыбыгар «Наһаа үчүгэй», Анастасия Готовцева Алексей Потапов матыыбыгар «Тамалакаан туһунан» ырыалары сүрэхтээн, дьон-сэргэ биһирэбилин ыллылар.
Саха суруйааччылара, хоһоонньуттара Дмитрий Наумов, Афанасий Гуринов-Арчылан, Василий Харлампьев-Хара Лааҥкы, Уйбаан Николаев-Уххан, Виктор Хон-Омук Уола, Арассыыйа аатырбыт спортсменката Сардаана Трофимова уонна Руфовтар оҕолоро, сиэннэрэ кыттан, ыһыаҕы киэргэттилэр. Салгыы, 2018 с. марафоҥҥа Арассыыйа чемпионатын кыайыылааҕа Сардаана Трофимова бирииһигэр кыргыттарга, уолаттарга сүүрүү күрэһэ ыытылынна.
Ыһыах араас күрэхтэһиилэригэр бириистэргэ Мария уонна Семен Руфовтар ааттарын үйэтитэр пуонда 1 убаһаны, Сэмэн Тиитэбис балтылара Мария Спиридонова уонна Мотрена Местникова оҕолоро биирдии убаһаны туруордулар.
Ыһыахха ыалдьыт быһыытынан ыҥырыллыбыт Ирена Файрушина хаан аймахтарын кытары билистэ. Ирена аҕата Валентин бииргэ төрөөбүт эдьиийдэрин кытары пуонда аатыгар харчы биэрдилэр. Онон, Файрушиннар дьиэ кэргэн кылааттара инникитин Семен Руфов хоһоонноругар суруллубут ырыалар хомуурунньуктара тахсарыгар көмө буолуоҕа.
Семен Руфов төрөөбүтэ 90 сылыгар аналлаах Ыһыахха сылдьыбыт үгүс дьон махталларын биллэрдилэр.
Виктор Хон-Омук Уола:
«Норуот улуу бэйиэтэ Сэмэн Тиитэбис Уруукап төрөөбүт-үөскээбит түөлбэтигэр Ыһыахха ыалдьыттаан кэллим. Сэмэн Тиитэбиһи кытары Уххан билсиһиннэрэн, бэрт кыратык да алтыһан аастарбыт, кэлин сэргэхтик сэлэһэрбит. Уолаттарыттан Валераны уруккуттан билэрим, онтон Максимы кытары айан былаһын тухары кэпсэтэн-ипсэтэн, чугастык билистим.
Сэмэн Тиитэбис биир сыл Уххан биһиккини Намҥа «Тобуруокап көмүс күһүнүгэр» бэйэтинэн ыҥыран, бара сылдьыбыппыт. Онно убайбытыгар Хара Лааҥкыга тиийэн, хонон-өрөөн ыалдьыттаабыппыт. Бу да сырыыга Ухханныын киниэхэ хонон-өрөөн, саха аһылыгын маанытын амсайан, астынан кэллибит. Тамалакааҥҥа эмиэ күндү ыалдьыттары курдук көрүстүлэр. Онон, Тиитэбис барахсан үтүөтүк саныыр дьонун ахсааныгар киирсэрбиттэн үөрдүм, махталым муҥура суох.
Семен Тиитэбис оҕолоро бары — дьоһун дьон. Ол да иһин, аҕаларыгар анаан Ыһыах ыстахтара, күндүтүк саныыр дьоннорун ыҥырдахтара. Убайбыт Тиитэбис барахсан олох аттыбытыгар арыаллыы сылдьарын курдук санаатым. Үтүө дьон үтүөлэрэ хаһан да умнуллубат, утумнанан бара турар айылгылаах. Онон, сахам дьоно, бу улуу убайбыт Сэмэн Тиитэбис иитэн-такайан таһаарбыт оҕолоруттан холобур ылыахха», – диэн санаатын үөрэ-көтө үллэһиннэ.
Тамалакаан олохтоохторо уонна ыалдьыттара биир дойдулаахтара, таптыыр, ытыктыыр киһилэрэ Семен Руфов оҕолоро Дьокуускайтан кэлэн Ыһыаҕы тэрийсибиттэригэр, аҕаларын аатын үйэтитэргэ үгүс үлэни ыыта туралларыгар ис сүрэхтэриттэн махтаннылар.
Надежда ЕГОРОВА,«Саха сирэ» хаһыат, edersaas.ru