Семен Сенин: «Дьиэбититтэн тэйбиппит үһүс нэдиэлэтигэр барда»
Мэҥэ Хаҥалас улууһун киин балыыһатын инфекционнай отделениетыгар бүгүҥҥү күҥҥэ сэттэ киһи сыстыганнаах дьаҥҥа сутуллан сытар.
edersaas.ru
Кинилэри отделение 11 эмчитэ уонна техүлэһитэ көрөр-истэр. Инфекционнай салаа терапевт-бырааһа Семён Сенин эмчиттэр үлэлэрин туһунан маннык билиһиннэрэр:
— Дьиэбититтэн тэйбиппит, балыыһа территориятыгар олорон үлэлээбиппит үһүс нэдиэлэтигэр барда. Дьоммутун кытта төлөпүөнүнэн кэпсэтэн билсэбит. Олорор-үлэлиир усулуобуйа барыта баар.
Аспытын балыыһа хааччыйар. Кэлиҥҥи күннэргэ биир дойдулаахтарбыт — уопсастыбанньыктар дьиэ аһын тиэрдэр буоллулар. Ол курдук, сибиэһэй үүт ас, сылаас бэрэски, соркуойга тиийэ ыыталлар. Онон үтүө санаалаах дьоммутугар махталбытын тиэрдэбит.
Ыарыһахтарбыт этэҥҥэлэр. Сүүрбэччэ хоннулар. Биллэн турар, үлэбит олус сэрэхтээх. Бары быраабыланы толору тутуһабыт.
Үлэһиттэр бары нэдиэлэ аайы анаалыс туттарабыт, этэҥҥэбит. Бэҕэһээ коронавируһу утары үлэлиир эмчиттэргэ анаан муус устардааҕы федеральнай харчы түспүтэ. Биһиги отделениебытыгар муус устар 28 күнүгэр сыстыганнаах дьаҥҥа хаптабыттар киирбиттэрэ. Онон үс күннээҕи төлөбүр түстэ. Аны ыам ыйыгар түһүөхтээх. Эригийиэннээҕи харчынан көмөнөн эмиэ туһанабыт. Маннык уустук усулуобуйаҕа үлэлиир дьону өйүүллэриттэн санаабыт көтөҕүллэр. Дойдубут, өрөспүүбүлүкэбит уонна улууспут салалталара, уопсастыбанньыктар үлэбитин сыаналыыр буолан, эрэх-турах сананабыт.
Ким санаан көрбүтэ баарай, сотору кэминэн тыа сирин балыыһаларын эмчиттэрэ маннык харыстанар таҥастаах сылдьыахтара диэн?!
Семен Семенович алталаах уолчаанын, кэргэнин кытта төлөпүөнүнэн кэпсэттэҕинэ санаалыын чэпчиир. Кини курдук эдэр дьон төрөөбүт дойдуларыгар туһалыы сырыттахтара.
Ийэ дойдуга бэриниилээх буолуу сылыгар эмчиттэр хорсун быһыыларыгар өрүү сүгүрүйэбит, кинилэргэ махтанабыт.
Елена ПОТОЦКАЯ, «Саха сирэ» хаһыат, edersaas.ru
Хаартыска — Семен Сенин тиксэриитэ.