Бу күннэргэ биллэр худуоһунньук Семен Луканси саҥа хартыынатын дьон дьүүлүгэр таһаарда. Хартыынатын “Антропоцен” диэн ааттаабыт уонна бу үлэтин ойуур баһаардарыттан эмсэҕэлээбит дьоҥҥо анаабыт.
— Сайыны быһа Саха сирэ, киэҥ нэлэмэн Сибиир хаарыаннаах ойуура умайда… Бу курдук улахан иэдээн аны тахсыбатар ханнык диэн Айыылрга үйэргэ эрэ тиийэбит. Умайбыт ойуур чөлүгэр түһэ охсоругар баҕарабыт, — диэн кини этэр.
- Быһаарыы: Антропоцен – бу киһи-аймах дьайыытыттан Сир, Аар Айылҕа муҥутуур эмсэҕэлиир кэмэ.
Семен Луканси айар үлэтэ сүрүннээн хотугу норуоттарга уонна хоту дойду айылҕатыгар ананар. Кини ураты буочардаах, туспа көрүүлээх, дириҥ толкуйдаах, уйан тыыннаах, үрдүк маастарыстыбалаах худуоһунньук. Аан дойдутааҕы уонна Арассыыйатааҕы быыстапкалар лауреаттара, норуоттар икки ардыларынааҕы бэстибээллэр кыттыылаахтара. Дьокуускайга Луканси айар оскуолатын арыйан үлэлэтэр.
Кини билигин Москваҕа олорор, айар-тутар. Төрөөбүт дойдутун кыһалҕатын, дьонун-сэргэтин долгуйуутун өрүү да чугастык ылынар. Ол ону “Бедствие”, “Скорбь”, Чурапчы көһөрүллүүтүн, Февронья Малгина туһунан, о.д.а. хартыыналара туоһулууллар.
В.И. Суриков аатынан Москватааҕы судаарыстыбаннай академическай художественнай институкка киирэн, бэйэтин истиилин булан, ситэн-хотон, кимиэллээхтик айан-тутан барбыта. Бу кэмҥэ Бүтүн Арассыыйатааҕы ыччат быыстапкатыгар, Флоренция куоракка Аан дойдутааҕы художественнай быыстапкаҕа, о.д.а. кыттыбыта. “Лондон глазами российских художников” Бүтүн Арассыыйатааҕы быыстапка дипломанынан буолбута. Сыал-сорук туруорунан, Крымҥа, Египеккэ, Италияҕа, Мароккоҕа, Турцияҕа, Израильга, Палестинаҕа, Исландияҕа пленэрдэргэ үлэлээбитэ, элбэҕи эбиммитэ.
Исландия Рейкьявик куоратыгар «Arctic Circle» аан дойдутааҕы бэстибээлгэ ыҥырбыттара, манна тус быыстапкатын туруорбута. Кини үлэлэрэ аан дойду искусствотын кэрэхсээччилэрин биһирэбиллэрин ылбыттара, быыстапкатын “ООН” генеральнай сэкиритээрэ Пан Ги Мун, Исландия бэрэсидьиэнэ Гудни Йоханссон, Канада генерал-губернатора Дэвид Ллойд Джонстон, Арассыыйа посоллара, худуоһунньук Йоко Оно (Джон Леннон огдообото) көрбүттэрэ.
Ангелина Васильева, “Саха сирэ” хаһыат, edersaas.ru
Хаартыска: ykt.ru