Сэлии муоһун хомуйууну көҥүллээһин хоту дьон дохуотун үрдэтиэҕэ

Бөлөххө киир:

Ил Түмэн сиргэ сыһыаннаһыыга, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев СИА-ҕа сэлии муоһун хомуйууну көҥүллүүр үлэ туһунан кэпсээтэ. Санатан эттэххэ, Саха сирин парламенын дьокутааттара регион нэһилиэнньэтин үгэс буолбут дьарыгын сокуонунан бигэргэтэргэ этии киллэрбиттэрэ.

Бэҕэһээ, ахсынньы 4 күнүгэр, Госдуумаҕа “Парламент киинэ-кулуубун” чэрчитинэн Сергей Ястржембскай “Страсти по мамонту” документальнай киинэтин көрдөрүү буолла. Маны Саха сиригэр эмиэ уһулбуттара. Көрүүгэ кыттыбыт Владимир Прокопьев хартыынаны интэриэһинэй диэн сыаналаата.

Норуот дьокутаата бэлиэтээбитинэн, Саха сиригэр сэлии уҥуоҕун хостооһун боппуруоһун сүрүннээһин күүстээх болҕомтоҕо тутуллар. Кэмитиэт бэрэссэдээтэлин чахчытынан, 2017 сыл түмүгүнэн сэлии фаунатын хомуйуу региоҥҥа 70 туонна кэриҥэ.

“Сэлии уҥуоҕун хостооһуну сокуонунан сүрүннүөххэ наада. Сөптөөх федеральнай сокуону ылыныахха биитэр бу боломуочуйаны субьектарга биэриэххэ. Арассыыйаҕа сэлии фаунатын хас да региоҥҥа хостууллар, Саха сиригэр саппаас уопсай ахсааныттан 80 быр. тиксэр, ол эбэтэр 500 тыһыынча туонната. Бу сокуонунан туһалаах баайдарга киирсибэт ураты көрүҥ буолар. Маны хостооһунунан, хомуйуунан олохтоохтор дьарыктаналлар. Бу олус ыарахан үлэ, ол эрээри үлэһиттэр бэрт кыраны аахсаллар. Атыылаһан ылааччылар олох кыра сыанаҕа атыылаһан баран, ону атыылаан, үгүөрү үбү аахсаллар.Бу эйгэни сүрүннээһин олохтоохторго туһалыаҕа – төһө хостоммута дьэҥкэ буолуоҕа, атыылыырга аһаҕас былаһааккалар баар буолуохтара, олор дьон дохуоттанарыгар көмөлөһүөхтэрэ”, — диир Владимир Прокопьев.

СИА.

+1
0
+1
0
+1
0
+1
0
+1
0
+1
0
+1
0