Муус устар 27 күнүгэр Дьокуускай куоракка Өрөспүүбүлүкэбит күнүн өрө ньиргиэрдээхтик бэлиэтээтибит. Араас хабааннаах тэрээһиннэр, пааматынньыктарга сибэкки дьөрбөтүн ууруу, кэнсиэрдэр, сэлэлии хаамыы буолла.
Маны сэргэ, Сахабыт сирин сорох улуустарыгар бу бырааһынньыгы эмиэ бэлиэтээтилэр. Ол курдук, Үөһээ Бүлүү, Чурапчы, Нам, Таатта о.д.а. улуустарыгар сэлэлии хаамыылар ыытылыннылар. Биир үксүн өрөспүүбүлүкэ тэриллэригэр сыһыаннаах дьонноох-сэргэлээх нэһилиэктэргэ маннык тэрээһиннэр ыытылыннылар быһыылаах.
Нам улууһун 2-с Хомустааҕын олохтоохторо сыллата бу бэлиэ күҥҥэ күргүөмүнэн сэлэлии хаама тахсаллар. Эдэр баһылык Лев Новгородов: «Олохтоохтор бары сахалыы таҥнан-симэнэн хаама тахсабыт, түмүгэр оһуокайдыыбыт. 1922 сыллаахха Максим Аммосов, Платон Ойуунускай, Исидор Барахов автономияны төрүттээбиттэрин ыччат, оҕолор билиэхтээх диэн санаанан сиэттэрэн бу тэрээһини ыытабыт. Манан салайтаран атын нэһилиэктэр эмиэ түмсэллэригэр, Өрөспүүбүлүкэ күнүгэр сэлэлии хаама тахсалларыгар баҕарабын уонна ыҥырабын», —диэн санаатын үллэстэр.
2-с Хомустаахтары холобур оҥостон, кэлэр сыл муус устар 27 күнүгэр Сахабыт сирин улуустарын нэһилиэктэрэ бары сэлэлии хаама тахсыахтара диэн эрэнэбит.
P.S. Миирнэй Удачнай куоратыгар бэлиэ күнү маннык бэлиэтээтилэр:
https://www.instagram.com/p/BwyDwdOBfSN/
edersaas.ru