Кулун тутар 5 күнэ — Саха Өрөспүүбүлүкэтигэр норуот маастарын күнэ.
Бүгүн, бу бэлиэ күҥҥэ, Дьокуускай куоракка сэлэлээн хаамыы өрүү да буоларын курдук улахан болҕомтону тарта. Быйылгы долгуйа күүтүүлээх тэрээһин Саха АССР 100 уонна Арассыыйа норуоттарын култуураларын үйэлээх баайын үйэтитии сылларыгар ананна.
Сэлэлээн хаамыы А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Антонида Корякина салалтатынан ыытылынна. Үөрүүлээх хаамыыга СӨ Тас сибээскэ уонна норуоттар дьыалаларыгар миниистири солбуйааччы Татьяна Пяткина, СӨ норуоттарын Ассамблеятын бэрэссэдээтэлэ Александр Подголов, А.Е.Кулаковскай аатынан норуоттар доҕордоһууларын дьиэтин айар кэлэктииптэрэ, НКО бэрэстэбиитэллэрэ, СӨ бастыҥ маастардара, үөрэх тэрилтэлэрэ, тыйаатырдар кыттыыны ыллылар.
Сааскы чаҕылхай күҥҥэ, сибиэһэй салгыннаах ыраас халлааҥҥа кэрэ көстүү сүргэни уратытык көтөхтө. Быйылгы хаамыыга барыта 1200 киһи кытынна.
Саха АССР 100 уонна Арассыыйа норуоттарын култуураларын үйэлээх баайын үйэтитии сылынан үөрэн-көтөн тураннар, бэлиэ күҥҥэ уран тарбахтаах маастардар «Саха дьонун үөрүүлээх күнүгэр» диэн бырайыак-аахсыйалаахтар. Ол иитинэн 100 кэмпилиэк дьахтар кыһыҥҥы таҥаһын, 100 чочуонай чороону уонна 100 дэйбиири бэлэмнээбиттэр.
Арассыыйа норуоттарын култуураларын үйэлээх баайын сылынан СӨ Бырабыыталыстыбатын Бэрэссэдээтэлин солбуйааччы Сергей Местников дьоҥҥо-сэргэҕэ истиҥ эҕэрдэтин тиэртэ. Кини Ил Дархан Айсен Николаев сорудаҕынан улахан кэлимсэ былаан оҥоһуллубутун, өрөспүүбүлүкэҕэ бу сылга 260 тэрээһин ыытылларын бэлиэтээн эттэ.
СӨ Култуура уонна духуобунай сайдыы миниистирэ Юрий Куприянов өрөспүүбүлүкэҕэ 253 киһи «СӨ норуот маастара» бочуоттаах ааты, 511 киһи «Норуот уус-уран оҥоһуктарын маастардара» ааты сүгэллэринэн киэн туттарын эттэ. Үөрүүлээх күнүнэн эҕэрдэтин тиэрдэ, төрөөбүт дойдуларын сайыннарар туһугар дьүккүөрдээх үлэлэрин иһин махтанна.
Тэрээһиҥҥэ Москваттан «Царицыно» заповедник-музейтан Ольга Докучаева, Алтайтан «Алтайский войлок» норуот уус-уран оҥоһуктарын Ассоциациятын бэрэсидьиэнэ Айсура Таханова ыалдьыттаатылар, эҕэрдэ тылларын тиэртилэр.
Саха Өрөспүүбүлүкэтигэр норуот маастарын күнүнэн уруй-айхал!
Хаартыскалар Андрей Сорокин (СИА) түһэриилэрэ уонна А.Е.Кулаковскай аатынан норуоттар доҕордоһууларын дьиэтин пресс-сулууспатыттан