АЛРОСА алмаас пуондатыттан сэдэх экспонаттар кэлиэксийэлэрин өрөспүүбүлүкэ олохтоохторугар көрдөрүүгэ таһаарда.
edersaas.ru
Сэдэх экспозиция алмаастаах куораттар олохтоохторугар тиийдэ. Быыстапка от ыйын устата Мииринэйгэ, Удачнайга уонна Айхалга көрдөрүллүөҕэ. Бу үтүө түгэн САССР 100 сылыгар уонна Саха сирин алмааһы хостуур бырамыысыланнаһын 65-сыллаах үбүлүөйүгэр ананар.
Мииринэй куораттааҕы “Алмаас” Култуура киинэ билигин дьиҥнээх кылааттаах сиргэ кубулуйда. «АЛРОСА алмаастаах пуондата» диэн ааттаммыт быыстапкаҕа бу күннэргэ АЛРОСА араас сылларга хостообут алмаастара, ону сэргэ хампаанньа маастардара оҥорбут бриллианнара уонна ювелирнай оҥоһуктара көрдөрүллэллэр. Манна мунньуллубут экспонат уопсай ыйааһына — 2,5 тыһыынчаттан тахса карат. Быыстапкаҕа сэдэх өҥнөөх, көрүҥнээх уонна кээмэйдээх алмаастар бааллар. Онтон саамай ураты кристаллар бэйэлэрэ ааттаахтар.
«Алмааһы хостооччулар, Мииринэй оройуонун олохтоохторун үгүстэрэ алмааһы илэ харахтарынан көрбөтөхтөрө. Онон бу быыстапкаҕа биһиги улууспут олохтоохторугар күндү таастары көрөр кыаҕы биэрэр”, — диэн АЛРОСА генеральнай дириэктэрин солбуйааччы Алексей Дьячковскай эттэ.
«Мин бастакы сылдьааччылары кытары киирэн баран, бу дьиҥнээх алмаастар диэн итэҕэйиэ суох курдук, дьикти эйгэҕэ киирбиппин өйдөөбүтүм. Маннык кыах олох сэдэхтик бэриллэрэ буолуо, мин : “Ама, бу барыта дьиҥнээх дуо?” – диэн кыра оҕо курдук бэйэбиттэн ыйыта турбутум”, — диэн АЛРОСА Култуура-успуорт комплексын дириэктэрэ Мотрена Скрябина санаатын үллэһиннэ.
Кэлбит ыалдьыттарга гиидтэр хас биирдии тааһы кырыылааһын уонна сыаналааһын кистэлэҥин кэпсиэхтэрэ. Тэрээһин Мииринэй куоракка от ыйын 17 күнүгэр диэри үлэлээн баран, салҕыы Удачнай уонна Айхал куораттарга айанныаҕа.
“Саха сирэ”, edersaas.ru саайтка анаан Анна ВИНОКУРОВА