Өрөспүүбүлүкэбит историятыгар ураты суолталаммыт Сэбиэттэр бастакы Бүттүүн Саха сиринээҕи съезтэрин 95 сылыгар аналлаах тэрээһиннэр бүгүн, ахсынньы 25 күнүгэр, Дьокуускай куоракка ыытыллаллар.
Бэлиэ күн Саха Өрөспүүбүлүкэтин Ил Түмэнин салалтата, норуот депутаттара, государственнай сулууспа ветераннара, эдэр ыччат өрөспүүбүлүкэбитин төрүттээбит, сайдыыга дьоһун суолу тэлбит, бастакы съеһи тэрийбит, делегат быһыытынан кыттыбыт чулуу дьоммут сырдык ааттарыгар сүгүрүйдүлэр.
Саха Өрөспүүбүлүкэтин Ил Түмэнин Бэрэссэдээтэлэ Александр Жирков, IV ыҥырыылаах Саха Өрөспүүбүлүкэтин Ил Түмэнин Бэрэссэдээтэлэ Виталий Басыгысов, Ил Түмэн судаарыстыбаннай тутулга, сокуоннаска сис кэмитиэтин бэрэссэдээтэлэ Алексей Еремеев, Ил Түмэн хотугу аҕыйах ахсааннаах төрүт олохтоох омуктар уонна Арктика дьыалаларыгар сис кэмитиэтин бэрэссэдээтэлэ Елена Голомарева Максим Кирович Аммосов пааматынньыгар сибэкки уурдулар.
Оттон киэһэ Д.К.Сивцев – Суорун Омоллоон аатынан опера уонна балет тыйаатырыгар Ил Түмэн, СӨ бырабыыталыстыбатын уонна өрөспүүбүлүкэ общестенноһын мунньаҕа буолла. Манна Ил Дархан Егор Борисов, Ил Түмэн спикера Александр Жирков, СӨ норуодунай депутаттара, Үрдүкү Сэбиэт бэтэрээннэрэ уо.д.а. кыттыыны ыллылар. edersaas.ru